Söngvarinn Aaron Carter fannst látinn á heimili sínu í nóvember og hefur almennt verið talið að hann hafi látist af slysförum. Móðir hans, Jane Carter, er þó ekki sammála og telur að sonur sinn hafi verið myrtur.

Sjá einnig: Síðustu dagarnir í lífi Aarons Carter

Hún skrifaði á Facebook þann 1. mars að mörgum spurningum væri ósvarað um andlátið. Hún tók fram að sonur hennar hefði fengið fjölmargar líflátshótanir áður en hann lést, meðal annars frá dópsölum og öðrum glæpamönnum sem hann hafi skuldað pening.

Hún telur að lögreglan sé haldin fordómum gegn þeim sem glíma við fíkn og hafi þess vegna afskrifað að um morð gæti verið að ræða.

Nú hafa vinir Aarons, Morgan Matthews og Bryan Cassidy, stigið fram og tekið undir með Jane.

Þeir telja að rannsaka þurfi andlátið nánar og þá sem mögulegt morð.

„Hann var alltaf hræddur um að einhverjir vildu honum illt eða að einhver tiltekinn vildi honum illt,“ sagði Cassidy í samtali við Page Six.

„Hvernig líkamsleifar hans fundust vakti líka með mér grunsemdir því ég hugsaði: Bíddu nú hægur, var hann með ofsóknarbrjálæði eða ekki? Ég vil ekki ásaka neinn hér en það er eitthvað sem gengur ekki upp við þetta.“

Matthews sem var umboðsmaður Aarons tekur undir þetta og segir að Aaron hafi verið í slæmum félagsskap og hafi oft viðrað þær áhyggjur sínar.

„Hann sagði – Það er fólk að elta mig, ég þarf hjálp. Ég þarf að komast úr þessum bæ. Hann var að reyna að fara, húsið hans hafði verið á sölu í langan tíma.“

Enn er beðið eftir niðurstöðum krufningar. Aaron fannst í baðkari fullu af vatni en ekkert vatn fannst í lungum hans og því hefur verið útilokað að hann hafi drukknað.