„Það sem margir miðaldra menn óttast mest eru hugrakkar ungar stúlkur og konur sem þora að standa á skoðun sinni og berjast fyrir henni. Dæmi um þetta er hin sænska Greta Thunberg, hin pakistanska Malala og á Íslandi Sólveig Anna Jónsdóttir. Þökk sé öllu því unga fólki sem ég umgengst þá er ég sérstakur aðdáandi ungs fólks sem þorir að benda á villur minnar kynslóðar og þar er svo sannarlega af nógu að taka,“ segir Jón Óðinn Waage, leiðbeinandi barna með hegðunarvandamál og fyrrverandi júdóþjálfari, í pistli á Akureyri.net.

Hann segist sjálfur vera að verða sextugur, að einstaklingar verði miðaldra 35 ára og séu það til 58 ára, eftir það séu þeir gamlir. 

„En aldur er bara tala, það er hvernig maður hugsar sem skiptir öllu máli,“ segir Jón Óðinn, sonur einstæðrar móður sem hann segir hafa unnið þrjú störf til að sjá fyrir börnum.

„Og lét sig ekki muna um að samtíðis berjast fyrir réttindum annarra. Þannig að þeir sem berjast fyrir réttindum fátækra einstæðra mæðra eru svo sannarlega í mínu liði. En margir kynbræður mínir virðast sjá allt það versta í þessum þremur sem ég nefndi hér að framan. Það er mér fullkomlega óskiljanlegt.“

Rifjar Jón Óðinn upp að hann var staddur á Arlanda flugvellinum í Stokkhólmi ásamt fósturdóttir sinni. Maður á hans aldri sem sat við hlið hans hafi séð Jón Óðinn skoða frétt um Gretu Thunberg. „Og þar sem við vorum á svipuðum aldri taldi hann allar líkur á því að ég deildi skoðunum með honum. Hann benti á símann minn og hafði orð á því að Greta væri nú meiri bullukollurinn,“segir Jón Óðinn.

Fósturdóttir Jóns Óðins hafði stuttu áður staðið fyrir skólaverkfalli í heimabæ þeirra til að taka undir með Gretu Thunberg. 

„Fimmtán mínútum síðan stóð hann upp, þakkaði okkur innilega fyrir að hafa opnað huga sinn, nú sæi hann hlutina í allt öðru ljósi. Ég held að hann hafi meint það, en kannski var hann bara að forða sér.

Og til ykkar kæru kynbræður á mínum aldri, hafi þessi skrif mín móðgað ykkur þá veit ég alveg hvernig ykkur líður því þannig leið mér í ræktinni þegar ég var kallaður ellilífeyrisþegi.“

Pistilinn má lesa í heild sinni á Akureyri.net.