Jenna Bush Hager er bandarísk fjölmiðlakona, rithöfundur og þáttastjórnandi morgunþáttarins Today with Hoda & Jenna á NBC. Hún, ásamt tvíburasystur sinni Barböru, er dóttir fyrrverandi forseta Bandaríkjanna George W. Bush, og fyrrverandi forsetafrú Bandaríkjanna Lauru Bush.
Í þætti Today í gærmorgunn gagnrýndi hún Kim Kardashian harðlega fyrir að hafa haldið „eyðslusama og yfirgengilega“ afmælisveislu fyrir North, sem varð níu ára. Page Six greinir frá.
„Ég á níu ára dóttur og hún fékk ekki svona afmælisveislu,“ sagði Jenna Bush. „Því þetta partí var allt of mikið!“
Jenna á þrjú börn með eiginmanni sínum Brian Hager, þau: Milu, 9 ára, Poppy, 6 ára, og Hal, 2 ára.
Fyrr í vikunni deildi Kim Kardashian myndum úr afmæli North á Instagram.
North og afmælisgestir hennar ferðuðust með einkaþotu sem var skreytt að innan eftir þema afmælisins – sem var draugaleg óbyggð (e. spooky wilderness).
Afmælisstúlkan og vinkonur hennar gerðu ýmislegt skemmtilegt í skóginum, eins og bogfimi og „zip-line.“
Þær gistu síðan allar í rúmum sem voru skreytt með dádýrahöfðum og gerviblóði.
Grínistinn Michelle Buteau, sem var að stjórna þættinum með henni, var sammála Jennu og sagði að afmælið hefði verið „yfirgengilegt.“
