Rithöfundurinn Elísabet Jökulsdóttir flutti örfyrirlestur um eitthvað fallegt á Svavarssafni, athygli hefur vakið að í gjörningnum sveiflaði Elísabet af sér kjólnum til að sýna að hún „væri líka eitthvað fallegt.“

Gjörningurinn hefur vakið töluverða athygli en Vísir ræddi við Elísabetu sem útskýrir nánar hugmyndina á bakvið hann. Hún segist hafa raðað steinum í kringum sig og farið með lítinn fyrirlestur um fegurðina, sagt að hún væri viðkvæm eins og kynlíf og trúmál.

„Svo sveiflaði ég kjólnum af mér til þess að sýna að ég væri líka eitthvað fallegt þegar ég var að lesa upp eitthvað fallegt, þó ég væri 64 ára og tíu kílóum of feit, af því að það er eitthvað fallegt við okkur öll,“ segir hún í samtali við Vísi.

Snæbjörn Brynjarsson átti hugmyndina að gjörningnum og hjálpaði Elísabetu á meðan á honum stóð. Elísabet segir að viðtökurnar við þessu hafi verið góðar.

Þetta var ekki í fyrsta skiptið sem Elísabet gerir nektargjörninga en hún segir að það sé þó mjög langt síðan hún hefur þorað því. „Þetta er alltaf mjög frelsandi og fólk er ekkert hneykslað, það tekur þessu bara svona eins og þetta er. Maður er að sýna sig og fólk er ánægt með að einhver þori því,“ segir Elísabet enn fremur í samtali við Vísi.