Herra Hnetusmjör hefur sett bílinn sinn á sölu og vill fá 5,3 milljónir fyrir hann. Bílinn sem um ræðir er Skoda Superb L&K og kostar nýr svoleiðis rúmar átta milljónir hjá Skoda-umboðinu. Hann birtir myndir af bílnum á Instagram-síðu sinni.
Bílinn er afar glæsilegur og er með rúmgóðu skotti. Á sínum tíma rúllaði Herra Hnetusmjör um bæinn á kerrunni með einkanúmerið KBE. KBE er tónlistarhópurinn sem hann tilheyrir en samkvæmt myndunum er hann nú búinn að fjarlægja númerið.
Bílinn kallar hann Kóp mobile en annar vinsæll rappari, Birgir Hákon, kýs að kalla bílinn „HerraKerra“ ef marka má ummæli hans við færsluna. Herra Hnetusmjör vill að áhugasamir sendi sér einkaskilaboð ef þeir vilja kaupa bílinn.
Þó að Herra Hnetusmjör sé þekktastur fyrir tónlist sína þá hefur hann einnig verið að fikra sig inn í viðskiptaheiminn. Hann er eigandi skemmtistaðarins 203 og opnaði nú á dögunum verslunina Vörin sem selur nikótínpúða.
