Breski tónlistarmaðurinn Noel Gallagher hefur fengið sig fullsaddan af þeirri öldu ofbeldisglæpa sem gengið hefur yfir í London undanfarin misseri. Noel, sem sló rækilega í gegn með hljómsveitinni Oasis, hyggst flytja frá höfuðstað Englands.
Ofbeldisglæpir, og þá einkum hnífstunguárásir, hafa verið algengar í höfuðborginni að undanförnu en Noel á þrjú börn ásamt eiginkonu sinni, Söru MacDonald. Börnin eru 8, 11 og 19 ára. Segist Noel ekki geta hugsað sér að börn hans muni alast upp í borginni þar sem þau geta átt á hættu að verða fyrir árás.
Á dögunum var maður stunginn í götunni þar sem fjölskyldan býr og segir Noel í samtali við Independent á Írlandi að það hafi verið kornið sem fyllti mælinn. Þetta var önnur árásin í nágrenni við heimili Noels á undanförnum mánuðum. Aðspurður segist Noel ekki vilja taka áhættuna á því að börn hans verði rænd eða ráðist verði á þau.
