Blaðamannafundi með þeim flytjendum sem eru komnir í úrslit Eurovision á laugardagskvöld lauk nú fyrir stundu.
Fundurinn var stuttur og snarpur og gafst blaðamannamönnum að spyrja hvern flytjanda spurninga – aðeins einnar spurningar í fyrstu umferð. Enn fremur drógu flytjendur úr potti hvort þeir skemmta í fyrri eða seinni helming keppninnar á laugardagskvöld.
Klemens Hannigan, annar söngvari Hatara, og Felix Bergsson, fararstjóri íslenska teymisins, mættu fyrir hönd Íslands á fundinn. Klemens sagðist vera fullur þakklætis eftir kvöldið.
„Við erum mjög þakklátir fyrir þetta tækifæri. Það er augljóst að kapítalismi er einu skrefi nær því að falla. Allt er samkvæmt áætlun,“ sagði Klemens og hófst svo handa við að þakka öllum sem hafa stutt við bakið á Hatara – frændum, frænkum, öfum, ömmum, auk heimsþekktra vörumerkja.
„Öll fyrirtækin sem hafa stutt okkur – McDonald’s, Deutsche Bank, það eru svo mörg, Domino’s.“
Uppskar Klemens mikinn hlátur eftir þessa upptalningu. Þá dró hann úr fyrrnefndum potti og nú liggur fyrir að Hatari treður upp í seinni helming Eurovision úrslitakeppninnar. Eftir dráttinn sneri fundarstjóri sér rakleiðis að næsta flytjanda, Serhat frá San Marínó, án þess að gefa blaðamönnum færi á að spyrja Klemens spurninga.
„Hleypið Hatara að!“ var þá kallað úr sal. Þá fékk Stefán Árni Pálsson, blaðamaður Sýnar, að bera upp sína spurningu. Hann spurði hvort atriðinu yrði breytt og hvaða þýðingu þessi árangur hefði.
„Mér finnst erfitt að svara þessari spurningu án þess að vera of pólitískur. Mig langar virkilega að svara þér með hreinskilnu svari en ég held að það yrði of umdeilt við þessar aðstæður,“ sagði Klemens.
Hataraliðar hafa áður átt í erfiðleikum með fundarstjórann sem stjórnaði fundinum, eins og lesa má um hér.
Hægt er að horfa á fundinn hér fyrir neðan:
