Stórleikarinn Jóhannes Haukur Jóhannesson verður stigakynnir fyrir Íslands hönd í Eurovison í ár.
„Þegar ég var beðinn um þetta sagði ég strax já,“ segir Jóhannes Haukur í tilkynningu frá RÚV. „Ég geri mér grein fyrir að þarna dugar ekkert hálfkák og best að afgreiða þetta af öryggi og festu ásamt lipurð og sveigjanleika. Svo er þetta tækifæri til að gleðja börnin mín. Þeim mun eflaust þykja þetta töff. Ég vona það allavega.“
Jóhannes Haukur er meðal þekktustu leikara þjóðarinnar en hann hefur undanfarið tekist á við stór hlutverk bæði hérlendis og erlendis. Hann lék meðal annars aðalhlutverkin í Svartur á leik, Ég man þig, Hollywoodmyndinni Alpha, auk þess sem hann birtist heimsbyggðinni sem Lem Lemoncloac í Game of Thrones.
Hatari keppir í úrslitum Eurovision næstkomandi laugardagskvöld.
