Miðvikudaginn 28. nóvember fer fram málþing um tilgang dómabirtinga á netinu. Er það á vegum Dómarafélagsins, Lögmannafélagsins og Lögfræðingafélagsins og tengist fyrirliggjandi og umdeildu frumvarpi dómsmálaráðherra, Sigríðar Á. Andersen. Samkvæmt frumvarpinu yrði hætt að birta dóma í „viðkvæmum málum“, svo sem kynferðisbrotamálum, og öll nöfn afmáð í sakamálum.

Athygli vekur að þeir sem taka til máls eru dómarar, lögmenn og svo Helga Þórisdóttir, forstjóri Persónuverndar. Þá ávarpar Sigríður sjálf samkomuna. Engir ritstjórar, blaðamenn eða aðrir talsmenn upplýsingafrelsis taka til máls.

Ætla má að umræðan verði ansi einsleit á málþinginu og að í raun verði hún nokkurs konar halelúja-samkoma til stuðnings frumvarpinu og ráðherra.