Orðið á götunni er að grasrót Miðflokksins logi nú ljósum logum og að stór hluti hennar heimti nýja forystu. Krafa er um Gunnar Bragi og Bergþór Ólason segi af sér strax, áður en að mótmælin sem boðuð eru um helgina á Austurvelli, fara fram. Ekki sé nóg að fara í leyfi, líkt og ætlunin er.
Hinn hópurinn, þeir sem tala um að standa saman og þétta hópinn, er lítill og sagður hagsmuna að gæta, en þeir séu allir á „spenanum“.
Sá hópur er hinsvegar nokkuð valdamikill.
Þess má geta að stjórn Miðflokksins er skipuð fjórum þingmönnum; einmitt þeim fjórum sem sátu að sumbli á Klaustur bar.
Sigmundur Davíð er formaður, Gunnar Bragi er varaformaður, Kolbrún Anna er annar varaformaður og Bergþór er fulltrúi þingflokksins.
Gunnar Bragi er sagður hrokafullur í tilsvörum og vill fólk að hann víki til að hægt sé að rétta flokkinn af, því enn sé fólk í flokknum sem hafi hugsjónina að leiðarljósi.
Rætt er um að Birgir Þórarinsson taki við sem þingsflokksformaður. Hann þykir traustur, vel liðinn og með gríðarmikla menntun í alþjóðasamskiptum. Hann er rólegur, en metnaðargjarn að sama skapi. Einnig munaði ekki mörgum atkvæðum að hann næði að verða varaformaður. Hann var í Alþingishúsinu, í vinnunni, þegar hinir þingmennirnir sátu að sumbli á Klaustur bar.
