Orðið á götunni er að Kristrún Frostadóttir, forsætisráðherra, megi vel við una um þessi áramót. Fyrstu fjárlög ríkisstjórnar hennar voru samþykkt vel tímanlega fyrir jól þrátt fyrir ýmsa tilburði stjórnarandstöðunnar til að tefja og þvælast fyrir. Á gamlársdag mætti hún í Kryddsíldina á Sýn og leiddi valkyrjurnar af öryggi er þær höfðu algera yfirburði yfir skapstyggri, loftlausri og frasakenndri stjórnarandstöðunni í þættinum. Sjálf setti Kristrún þannig ofan í við Sigmund Davíð Gunnlaugsson, er hann byrjaði rétt einu sinni söng sinn um skattahækkanir og hækkun ríkisútgjalda á vakt þessarar ríkisstjórnar, að hann sat skömmustulegur eftir og hafði sig lítið í frammi.
Orðið á götunni er að ávarp forsætisráðherra á gamlárskvöld hafi síðan verið með bestu slíkum ávörpum í seinni tíð. Af yfirvegun fór Kristrún yfir árið, verkefnin sem ríkisstjórnin stendur frammi fyrir, árangurinn sem náðst hefur og áskoranir sem við stöndum frammi fyrir, ekki síst vegna stöðu alþjóðamála. Hún fór líka yfir söguna og tengdi það á næman hátt við sína eigin fjölskyldusögu. Lagði svo áherslu á hversu samhent þessi ríkisstjórn er í að byggja upp atvinnulíf og ná tökum á ríkisfjármálum. Ekkert fálm eða fum, ekkert lýðskrum, bara trúverðug leiðsögn.
Orðið á götunni er að Kristrún hafi á þessu fyrsta ári ríkisstjórnar hennar stigið fram sem fullmótaður leiðtogi Íslands bæði inn á við og út á við. Augljóst er að enginn leiðtogi stjórnarandstöðunnar hefur roð við henni. Ósvífnustu fjölmiðlamenn mæta ofjarli sínum leggi þeir til atlögu við hana. Erlendis ljómar af henni og hún er Íslandi til mikils sóma. Menntuð í bestu skólum í Bandaríkjunum talar hún ensku af öryggi sem fáir búa yfir sem ekki hafa ensku að móðurmáli.
Á árinu hefur ríkisstjórnin náð lykilmálum í gegn og það þrátt fyrir fordæmalausar tafa- og málþófsaðferðir stjórnarandstöðunnar. Veiðigjaldaleiðréttingin var samþykkt. Til þess þurfti raunar að beita lýðræðisákvæði þingskapalaga til að stöðva umræður og kalla fram atkvæðagreiðslu eftir að stjórnarandstaðan hafði beitt málþófi í meira en 160 klukkustundir, sem er heill vinnumánuður, og þar með sett Íslandsmet. Lýðræðið hélt hins vegar. Minnihlutinn fékk ekki að ræna völdum á Íslandi.
Hlutur ríkisins í Íslandsbanka var seldur í vor. Eftirspurn var svo mikil að ákveðið var að selja allan hlut ríkisins til almennings. Eftirmál urðu engin. Allir ánægðir. Enginn ráðherra þurfti að segja af sér og Fjármálaeftirlitið þurfti ekki að sekta neinn. Ekki þurfti að reka neina bankamenn. Eitthvað annað en þegar síðasta ríkisstjórn reyndi að selja hlut í bankanum.
Í haust náðu mörg mikilvæg mál ríkisstjórnarinnar í gegn. Þrátt fyrir málþóf og tafaleiki stjórnarandstöðunnar. Þrátt fyrir áföll á borð við fall Play og lokun stórs hluta Norðuráls var hægt að afgreiða fjárlög með mun minni halla en fordæmi eru fyrir í tíð síðustu ríkisstjórnar, og það í tæka tíð til að þingmenn kæmust í gott jólafrí.
Svo komu áramótin og Kristrún sýndi yfirburði sína gagnvart stjórnarandstöðunni þannig að ekki fór fram hjá neinum. Orðið á götunni er að Kristrún Frostadóttir hafi styrkt stöðu sína svo um munar um þessi áramót.
