Sigmundur Davíð Gunnlaugsson á sér þann draum að verða borgarstjóri í Reykjavík. Hann hefur lengi haft mikinn áhuga á skipulagsmálum borga og varði námsárum sínum í ýmsum borgum víðs vegar að kynna sér þau mál. Um tíma átti hann sæti í Byggingarnefnd Reykjavíkur fyrir Framsóknarflokkinn meðan hann var í þeim flokki.
Nú gæti hann eygt möguleika á að láta draum sinn rætast. Miðflokkur Sigmundar er á miklu fylgisflugi um þessar mundir. Flokkurinn náði engum borgarfulltrúa kjörnum síðast en nú bendir allt til þess að hann komi mjög sterkur inn í komandi kosningum. Fylgi flokka sveiflast stundum mikið í borgarstjórn eins og Framsókn er besta dæmið um. Flokkurinn fékk engan mann kjörinn vorið 2018 en náði fjórum kjörnum borgarfulltrúum árið 2022. Samkvæmt nýjustu skoðanakönnunum stefnir í að Framsókn fái engan mann kjörinn í næstu kosningum þannig að sveiflur geta verið miklar.
Orðið á götunni er að Miðflokkurinn geti orðið einn af sigurvegurum næstu borgarstjórnarkosninga og gert kröfu um af fá borgarstjóraembættið í sinn hlut, til dæmi ef flokknum tekst að mynda meirihluta með Sjálfstæðisflokki og fleirum. Þá væri tilvalið að tefla Sigmundi Davíð fram sem borgarstjóraefni vegna þekkingar hans á borgarskipulagi og víðtækrar stjórnmálareynslu en Sigmundur hefur gegnt stöðu forsætisráðherra eins og flestir muna.
Á landsvísu hefur Miðflokkurinn verið að mælast með meira en 20 prósent fylgi á sama tíma og Samfylkingin hefur verið með 30 prósent og Sjálfstæðisflokkurinn rúm 15 prósent. Ekki er ósennilegt að fylgi þessara flokka á landsvísu muni endurspeglast talsvert inn í úrslit borgarstjórnarkosninganna í vor. Í ljósi þess gætu bæði Miðflokkur og Sjálfstæðisflokkur vænst þess að ná fimm borgarfulltrúum hvor – á góðum degi. Þeir þyrftu þá ekki mikið í viðbót til að geta myndað meirihluta í borginni undir styrkri stjórn Sigmundar Davíðs sem borgarstjóra.
Uppstillingarnefnd er að störfum hjá Sjálfstæðisflokknum og fundar stíft. Þar munu skoðanir vera mjög skiptar en Bessí Jóhannsdóttir, formaður Samtaka eldri sjálfstæðismanna, stýrir 15 manna nefndinni af mikilli festu. Innan nefndarinnar er tekist á um þær meginlínur að hreinsa nær alveg til á listanum eða halda í tvo núverandi borgarfulltrúa til viðbótar við Hildi Björnsdóttur en kynna að öðru leyti nýjan lista. Orðið á götunni er að ákveðið hafi verið að Brynjar Níelsson, fyrrum þingmaður flokksins, taki sæti á listanum. Barátta innan nefndarinnar mun vera mjög hörð um önnur sæti. Bessí nefndarformaður leggur áherslu á að Marta Guðjónsdóttir og Ragnhildur Alda María Vilhjálmsdóttir verði í líklegum sætum en ekki er einhugur um það.
Orðið á götunni er að einhverjir nefndarmann í uppstillingarnefndinni hafa hótað afsögn ef ekki næst samstaða um tiltekna skipan og Hildur Björnsdóttir er sögð mjög óróleg vegna stöðunnar. Ólíkir hópar innan flokksins takast hart á en klíkur hafa missterka stöðu eftir aldri, hverfum og stjórnmálareynslu. Eldri flokksmenn ráða miklu – óþægilega miklu að margra mati.
Orðið á götunni er að Sjálfstæðismenn séu mikið búnir að leita til þjóðþekktra einstaklinga eins og aðrir flokkar hafa gert með góðum árangri. Þá er átt við þekkt fólk úr sjónvarpi, íþróttamenn, listamenn og áhrifavalda en ekkert mun vera fast í hendi enn þá.
Stefnt er að því að listinn verði tilbúinn í byrjun mars. Spennan magnast.
