Smekkur kvenna á karlmönnum er ærið misjafn. Mörg fól í Íslendingasögum nutu mikillar kvenhylli eins og Þjóstólfur fóstri Hallgerðar langbrókar. Seinni tíma Njáluskýrendur eru á einu máli um ódrenglyndi og fantaskap Þjóstólfs en Hallgerður elskaði hann heitt og innilega. Reyndar lét hún drepa hann að lokum en það tilheyrði tíðarandanum. Allar vildu meyjarnar eiga Gunnar Hámundarson á Hlíðarenda þótt hann hafi síðar verið afhjúpaður sem ofbeldismaður á heimili. Mesta kvennagull þriðja ríkisins var hinn bæklaði og smávaxni Jósef Göbbels áróðursmálaráðherra sem ætíð var umvafinn fegurðardísum.

Umdeildasti maður samtímans er Dónald Trump forseti Bandaríkjanna. Hann skiptir heimsbyggðinni í tvær andstæðar fylkingar sem annað hvort dáir hann eða hatar. Trump er manna hreinskiptastur og segir hlutina umbúðalaust. Hann er strigakjaftur sem hikar ekki við að kalla andstæðinga sína úrþvætti og landeyður. Viðkvæmir og hörundssárir íslenskir þingmenn gætu aldrei setið undir ummælum forsetans án þess að bresta í grát og kvarta undan einelti í opnu rými.

Utanríkisráðherra landsins leyfði sér að segja á dögunum að sér hefði fundist Trump heillandi maður. Þessi ummæli urðu til þess að hinn horfni flokkur vinstri grænna reis upp frá dauðum og mótmælti kröftuglega. Aðdáun ráðherrans á Trump var niðurlægjandi fyrir íslenskar konur. Hún var sökuð um undirlægjuhátt og fyrirlitningu á mannréttindum með þessu skjalli um erkióvininn. Þetta er dæmigert fyrir öfgafulla skautun í heimi stjórnmálanna. Menn eru annaðhvort algóðir eða alvondir. Hugurinn hvarflar til fyrirrennara Vinstri grænna sem trúðu alltaf á góðmennsku og mannkosti Jósefs Stalíns þrátt fyrir uppljóstranir um mannréttindabrot og aðra fúlmennsku.

Trump er ólíkindatól og umdeildur og hefur unnið ótrúlega kosningasigra. Ummæli utanríkisráðherra komu á óvart en eru í takt við álit leiðtoga Evrópu á kappanum. Það sýnir líka töframátt forsetans að honum skyldi takast að vekja Vinstri græna upp af ruslahaugum sögunnar og gefa foringja þeirra nokkurra mínútna fjölmiðlaathygli. Flokkurinn hvarf síðan aftur ofan í gröf sína þar sem jákvæðar skoðanakannanir raska ekki ró hins látna stjórnmálaflokks.