Ingu Sæland, félags- og húsnæðismálaráðherra, blöskrar málþóf stjórnarandstöðunnar gegn veiðigjaldafrumvarpinu og þá einkum málflutningur þingmannsins Jóns Gunnarssonar sem sé að gefa til kynna að útgerðin eigi sjávarauðlind Íslendinga.

„Endilega hlustið á falsið og hræðsluáróður hinnar grímulausu hagsmunagæslu stjórnarandstöðunnar gegn eðlilegu og leiðréttu veiðigjaldi,“ skrifar Inga á Facebook-síðu sína.

„Jón Gunnarsson talar um skerðingu eignarréttar! HVAÐA EIGNARRÉTTAR? Er hann að segja að kvótakóngarnir eigi sjávarauðlindina??“

Inga telur að stjórnarandstaðan ætti frekar að gleðjast yfir því að hærri veiðigjöld muni skila sveitarfélögum hundruðum milljóna í auknar útsvarstekjur og að hægt verði að ráðast í endurreisn „mölbrotinna innviða“ sem núverandi ríkisstjórn hafi fengið í arf eftir forvera sína.

„Nei, ó nei, þá hrópa þeir og arga eins og við séum að koma öllu í kalda kol. Ömurlegt að verða vitni að öðru eins.“

Inga þakkar fyrir alla sem hafa hvatt ríkisstjórnina til dáða. „Við erum VALKYRJURNAR YKKAR og erum komnar til vinna landi og þjóð til heilla.“

Inga tekur fram að ríkisstjórnin ætli að koma veiðigjaldafrumvarpinu í lýðræðislega atkvæðisgreiðslu á þinginu.

„Stjórnarandstaðan er EKKI með NEITUNARVALD á Alþingi Íslendinga. Hún tapaði í sl. kosningum og einfaldlega verður að kyngja því að hafa misst völdin.“

Jón flutti ræðu á áttunda tímanum í kvöld þar sem hann vitnaði í færslu á samfélagsmiðlum eftir hæstarréttarlögmann sem benti á að skattheimta á borð við fyrirhugaða hækkun veiðigjalda gæti aldrei gengið svo langt að hún skerði eignarrétt manna. Rétt er að minna á að ríkisstjórnarflokkarnir hafa ítrekað vísað því á bug að veiðigjöld séu skattar enda eru þau frádráttarbær gjöld í rekstrarreikningi.