Skiptum er lokið í þrotabúi 1910 ehf. en félagið, sem hét áður Vök Waters ehf. var úrskurðað gjaldþrota þann 29. maí í fyrra. Skiptum lauk þann 27. desember síðastliðinn.

Í tilkynningu í Lögbirtingablaðinu er greint frá því að í heildina hafi kröfum upp á 212.597.304 krónum verið lýst í búið en engar eignir fundust í búinu. Síðasti birti ársreikningur félagsins er frá árinu 2022 en þá voru bókfærðar eignir 31,5 milljónir og skuldir um 31,8 milljónir.

Fyrirtækið framleiddi vatn undir vöruheitinu Vök sem ætlað var til sölu á erlendum mörkuðum og um tíma framleiddi félagið einnig kolsýrt vatn fyrir Rolf Johansen & Co.

Sjá einnig: Bruggfyrirtæki Fjallsins og félaga úrskurðað gjaldþrota

Félagið var í 100% eigu Alfreðs Pálssonar en hann tók einnig þátt í stofnun félagsins Volcanic Drinks, ásamt nokkrum viðskiptafélögum, árið 2010. Tilgangur félagsins var að framleiða sterkt áfengi úr íslensku vatni, meðal annars gin, vodka og viskí, en kraflyftingamaðurinn Hafþór Júlíus Björnsson var einn hluthafa auk þess að leika lykilhlutverk í markaðssetningu félagsins.

Hafþór Júlíus eignaðist svo fyrirtækið einn í febrúar 2022 en það var síðan tekið til gjaldþrotaskipta í júní 2023.