Þegar kemur að verðbólgumælingum Hagstofunnar og vaxtaákvörðunum Seðlabankans eru seðlabankamenn eins og hundur sem eltir skottið á sér. Vaxtahækkanir Seðlabankans fara beint inn í húsnæðislið neysluvísitölunnar og valda beint hækkun á henni og þar með verðbólgunni. Snorri Jakobsson, hagfræðingur og eigandi Jakobsson Capital, er gestur Ólafs Arnarsonar í Markaðnum á Eyjunni.

Markadurinn - Snorri Jakobsson -3.mp4

„Helsti vandinn núna er fasteignamarkaðurinn og hærri vextir eru ekkert að hjálpa Seðlabankanum á fasteignamarkaðnum. Þvert á móti,“ segir Snorri.

Hann segir gríðarlegan mun vera á verðbólgunni eins og hún er mæld hjá Húsnæðis- og mannvirkjastofnun og þeirri sem Hagstofan reiknar í vísitölu neysluverðs, sem inniheldur reiknaða húsaleigu. Verðbólgan væri umtalsvert lægri ef fasteignaverð væri notað beint inn í vísitöluna en ekki hin svonefnda reiknaða húsaleiga.

„Með þessari aðferðafræði sem Hagstofan notar, þá ef vextirnir hækka þá hækkar fasteignaverð sem þýðir að þegar Seðlabankinn hefur verið að hækka vexti mjög mikið þá hefur verðbólgan verið að mælast um einu prósentustigi hærri.“ Snorri segir þetta vera eingöngu vegna þeirra útreikninga sem Hagstofan notar.

Snorri segir aðferð Hagstofunnar vera galna. „Ég benti á þetta fyrir 20 árum og æsti starfsmenn Seðlabankans mjög mikið upp, þeir voru eins og hundur sem eltir skottið á sér.“