Ég hitti nýlega konu sem var í öngum sínum vegna þess að hún hafði sagt við son sinn að hann væri rétthentur en hún sjálf örvhent. Sonurinn sagði að hún væri með þessum ummælum að smána eða „sjeima“ hendur þeirra beggja. „Það er ekkert rétt við að nota hægri höndina meira en hina!“ sagði hann reiðilega. „Ég lendi iðulega í svona atvikum þar sem ég segi eitthvað vitlaust eða „læka“ eitthvað sem er harðbannað. Hvað get ég gert?“ Ég lét hana hafa einfaldan lista:

Vertu alltaf á móti hvalveiðum og lúpínu. Hvalir hafa rúmlega mannsvit og synda tignarlega um heimshöfin. Lúpínan er aðskotablóm sem hagar sér eins og Framsóknarflokkurinn. Hún leggur smám saman allt undir sig sem hún kemur nálægt.

Vertu hlynnt óheftum innflutningi þurfandi hælisleitenda og annars flóttafólks til landsins í nafni mannúðar. Þetta fólk er síðan ágætlega geymt í Keflavík, Bifröst eða Höfn í Hornafirði.

Vertu á móti laxeldi. Vestfirðingar sem vinna í greininni geta fengið tímabundin störf í ferðaiðnaðinum eða farið á örorku. Hatastu við virkjanir og vindmyllugarða. Landið er fullt af dýrmætum fossum sem enginn hefur séð nema fuglinn fljúgandi en eiga fullan tilverurétt.

Hafðu miklar efasemdir um störf og heimildir lögreglu. Í sakamálum hefur þolandinn eða brotaþoli alltaf á réttu að standa. Í utanríkismálum er nokkuð öruggt að hatast alltaf út í Trump og Ísraelsmenn. Vertu á móti Júróvisjón og blóðmerahaldi. Ráðlegt er að berjast fyrir bíllausum lífsstíl þótt þú eigir bíl og hafir aldrei komið upp í strætisvagn. Segðu bara: „Ég mundi hjóla ef hjólastígar væru eins og í Danmörku.“ Þú mátt reyndar eiga rafmagnsbíl þótt þú sért að drepast úr drægnikvíða.

„Byrjaðu hægt og smám saman lærirðu að fóta þig á þessu hála svelli. Gangi þér vel!“