Orðið á götunni er að allt sé komið á fullt varðandi undirbúning forsetaframboðs Katrínar Jakobsdóttur.
Vísbendingarnar eru á hverju strái. Þannig vakti það athygli að Katrín var mætt í settið hjá Gísla Marteini í Vikunni á RÚV síðastliðið föstudagskvöld og var þar í forsetalegum stellingum. Þá tók hún sér að setja saman vikumatseðil fyrir Morgunblaðið og valdi þar þjóðlega rétti á borð við plokkfisk og kjötsúpu sem var þó með fjölmenningarlegu ívafi.
Stærsta vísbendingin var þó eflaust sakleysisleg afmæliskveðja Katrínar á Facebook en þar fagnaði hún 46 ára afmæli eiginmanns síns, Gunnars Sigvaldasonar, sem og tuttugu ára sambandsafmæli þeirra hjóna.
Á pólitískum ferli Katrínar hefur Gunnar haldið sig algjörlega utan sviðsljóssins og því tímasetning kveðjunnar allra athygliverð. Maki forsetaframbjóðanda spilar óneitanlega stórt hlutverki í baráttunni um Bessastaði og því þykir líklegt að kveðjan sé til marks um það að Gunnar sé klár í slaginn og nú verði hafist handa við að svipta hann hulunni.
Telja má líklegt að á næstu vikum muni Katrín og hennar fólk gefa enn frekar í við að lauma að þjóðinni skilaboðum um að hún myndi verða prýðisforseti.
Splæst verður í skoðanakannanir bak við tjöldin og ef þær lofa góðu, sem allar líkur eru á, mun Katrín lýsa formlega yfir framboði skömmu fyrir lokafrestinn þann 26. apríl næstkomandi. Komi kannanirnar hins vegar illa út gæti Katrín endurskoðað málið.
Það er morgunljóst að ráðherrann tæki talsverða áhættu með framboði. Hún þyrfti að segja af sér núverandi embætti og ætti varla afturkvæmt í stjórnmálin fyrr en eftir talsvert hlé.
Það væri frekar neyðarleg staða fyrir forsætisráðherra að tapa forsetakapphlaupinu.
Þó Katrín sé sigurstrangleg þá hefur skuggi fallið á vinsældir hennar á þessu kjörtímabili og hún er berskjölduð fyrir gagnrýni úr öllum áttum. Enda hefur hún þurft að gera ýmiskonar þungbærar málamiðlanir í samstarfi sínu við Sjálfstæðisflokkinn og Framsókn í ríkisstjórnarsamstarfinu. Þá mun það eflaust reynast henni strembið að skilja við flokkinn sinn í sögulega slæmri stöðu.
Stutt og snörp kosningabarátta væri því best fyrir Katrínu. Það eru andstæðingar hennar sem verða líklegri að sækja á varðandi fylgi í kosningabaráttunni heldur en að hún rjúki skyndilega upp í vinsældum eftir sem á líður.
Hvað sem verður þá eru allar líkur á að sögulegar forsetakosningar séu í vændum.
