Trump sendi frá sér yfirlýsingu á mánudaginn þar sem segir að hann telji að Michael Whatley, formaður flokksins í Norður-Karólínu, og Lara Trump eigi að leiða flokkinn á landsvísu. Hann sendi tilkynninguna frá sér í kjölfar þess að ljóst varð að Ronna McDaniel, formaður flokksins, íhugar að láta af embætti.
Ef hún lætur af embætti eiga Whatley og Lara Trump að taka við af henni að mati forsetans fyrrverandi.
Trump hefur þrýst á McDaniel um að segja af sér eftir að forval flokksins í Suður-Karólínu fer fram síðar í mánuðinum.
Trump hefur gefið í skyn að hann vilji gera ýmsar breytingar á flokknum áður en forsetakosningarnar fara fram þann 5. nóvember næstkomandi. Allt stefnir í að hann muni berjast við Joe Biden um embættið.
„Vinur minn Michael Whatley ætti að verða næsti formaður RNC. Michael hefur verið með mér frá upphafi og unnið frábært starf í heimaríki sínu, Norður-Karólínu,“ segir í yfirlýsingu Trump, sem bætir síðan við: „Hin mjög svo hæfileikaríka tengdadóttir mín Lara Trump hefur fallist á að bjóða sig fram sem formann með Michael. Hún hefur sagt mér að hún sé reiðubúin í þetta og hún verður frábær.“