Joe Biden, forseti Bandaríkjanna, er 81 árs og ætti því kannski að vera farinn á eftirlaun fyrir nokkru. Ef Bandaríkjamenn eru spurðir þá telur mikill meirihluti þeirra að Biden sé of gamall til að gegna embættinu. Mun færri hafa áhyggjur af aldri Donald Trump, sem sækist eftir að verða forseti í kosningunum í nóvember, en hann er 77 ára.

Í skoðanakönnun, sem Reuters og greiningarfyrirtækið Ipsos gerðu meðal 1.237 Bandaríkjamanna, sögðust átta af hverjum tíu telja að Biden sé of gamall til að gegna embætti forseta. Biden er elsti maðurinn sem gegnt hefur forsetaembættinu.

Meðal Demókrata töldu sjö af hverjum tíu að Biden sé of gamall til að gegna embættinu.

Helmingur aðspurðra sagðist telja Trump of gamlan til að gegna forsetaembættinu.

Könnunin var gerð 9. febrúar og eru vikmörkin um þrjú prósentustig.

Að undanförnu hefur mikið verið rætt og ritað um hvort Biden sé of gamall til að gegna forsetaembættinu  og hvort minni hans sé orðið lélegt.