Fjárlagafrumvarp ríkisstjórnarinnar er að hluta til talnaleikur sem ekki er gott að átta sig alveg á í fljótu bragði. Þetta segir manni að líklegt sé að í frumvarpinu sé undirliggjandi þrýstingur, rétt eins og í Svartsengi, og að útgjaldatalan muni lyftast áður en frumvarpið verður að lögum. Þórólfur Matthíasson, hagfræðiprófessor emeritus, er gestur Ólafs Arnarsonar í hlaðvarpi Markaðarins á Eyjunni.
Markaðurinn - Þórólfur Matthíasson - klippa 2.mp4
„Hluti af þessu bætta umhverfi í kringum fjárlagagerðina og fjárhagsáætlanir hins opinbera er að sett var á fót fjármálaráð og þeir gefa umsagnir um fjármálaáætlanir og fjármálastefnuna. Þeir voru með margþáttaðar athugasemdir í vor, eins og svona ráð verða að vera með. Sumt var ekkert rosalega stórvægilegt, eins og að þeir gagnrýndu mjög að það var ekki staðið við dagsetninguna, 1. apríl, en það átti sína skýringu vegna kjarasamninganna, og einhvers konar vandræðagangur innan ríkisstjórnarinnar,“ segir Þórólfur.
Hann segir hins vegar að fjármálaráð hafi líka gagnrýnt sparnaðaráform, sem ekki væri búið að útfæra. „Við vitum nú að þegar menn segja þetta þá enda menn annað hvort í flötum niðurskurði sem svo sem gerir ekki neitt, það vill verða erfitt þegar að framkvæmdinni kemur að standa að slíku. Núna er sagt í frumvarpinu að það sé búið að útfæra sumar af þessum lækkunum og aðhaldi en svo þegar maður fór að kíkja á það þá er sumt sumt af því bara frestanir, t.d. á fjárfestingarútgjöldum. Það er búið að taka ákvörðun um að leggja þennan veg eða byggja húsnæði undir almannavarnarbatteríið – það er búið að fresta því nokkrum sinnum – það er ekki raunverulegur samdráttur, það er bara verið að geyma það til seinni tíma – það er búið að taka ákvörðunina um þessa ráðstöfun.“
Þórólfur segir líka að finna liði í fjárlagafrumvarpinu sem séu allloðnir. Greinilega séu einhverjar talnaæfingar á ferð, sem ekki sé alveg hægt að átta sig á í fljótu bragði. „En það er bara leikur að tölum. Hluti af þessu er leikur að tölum sem segir manni þá það að það er líklegt að það sé svona undirliggjandi þrýstingur, eins og í Svartsengi, að útgjaldatalan muni heldur lyftast.
Einnig er hægt að hlusta á Spotify.
