Eftir því sem kemur fram í bókinni þá hefur Biden viðurkennt fyrir nánasta samstarfsfólki sínu að hann sé stundum „þreyttur“ og að hann hafi margoft aflýst öllum fyrirætlunum sínum að morgni til vegna þess hversu gamall hann er orðinn.
Bókin heitir „The Last Politician: Inside Joe Biden‘s White House and the Struggle for America‘s Future“ og er hún skrifuð af blaðamanninum Franklin Foer. Hún kemur út í þessari viku en The Guardian fékk nýlega eintak af bókinni og fjallaði um hana.
Foer segir að gríðarleg pólitísk reynsla Biden hafi skipt miklu máli varðandi þær áskoranir sem Bandaríkin standa nú frammi fyrir. En hann segir einnig, eins og fleiri hafa gert, að spyrja verði sig hvort aldur Biden hafi áhrif á getu hans til að sinna starfi forseta.
„Það var sláandi að hann (Joe Biden, innsk. blaðamanns) sótti fáa morgunfundi og tók ekki þátt í mörgum opinberum atburðum fyrir klukkan 10 að morgni. Hátterni hans á opinberum vettvangi sýndi líkamlega hnignun og þverrandi andlega getu, sem hvorki lyf eða æfingar geta unnið gegn,“ skrifar Foer.
The Guardian segir að þrátt fyrir að athyglisverðar upplýsingar komi fram í bókinni hafi hún ekki enn verið sú stóra sprengja í bandarískri umræðu sem vænst var. Ástæðan fyrir því getur verið að Foer hefur ekki skýrt frá hvaða heimildarmenn skýrðu frá þreytu Biden. Penguin Random House, sem gefur bókina út, segir að hún byggist á „áður óþekktum aðgangi að innsta hring ráðgjafa sem hafa starfað með Biden í áratugi“ en segir ekkert um hvort Foer hafi rætt við Biden.