Viðskiptablaðið greindi frá því fyrir helgi að á fyrri helmingi ársins, frá janúar til júní, hefðu alþingismenn eytt meiru í utanlandsferðir, vegna starfa sinna, en þeir hafa gert síðan 2008 að raunvirði.
Í frétt Viðskiptablaðsins kemur fram að endurgreiddur kostnaður alþingismanna við utanlandsferðir á fyrri hluta þessa árs nam hátt í 42 milljónum króna og jókst um 48% á föstu verðlagi samanborið við sama tímabil í fyrra og kostnaður við uppihald í slíkum ferðum jókst um 62%. Þrátt fyrir að leiðrétt sé fyrir verðlagi þurfi að leita aftur til ársins 2008 – þegar botninn hrundi úr gengi krónunnar – til að finna meiri útgjöld vegna utanlandsferða þingmanna á hálfs árs tímabili.
DV kannaði kostnað vegna ferða einstakra þingmanna og hér á eftir verður birtur listi yfir þá 10 þingmenn sem voru Alþingi dýrastir vegna utanlandsferða sem þeir fóru í vegna starfa sinna á tímabilinu janúar til og með júní á þessu ári. Samantektin byggir alfarið á tölum sem gefnar eru upp á heimasíðu Alþingis.
Þótt ráðherrar séu einnig þingmenn greiða ráðuneyti kostnað vegna ferða þeirra erlendis og þar sem upplýsingar um kostnað vegna þeirra ferða eru ekki aðgengilegar á heimasíðu Stjórnarráðsins og heldur ekki á heimasíðu Alþingis, sem heldur aðeins utan um ferðakostnað sem það greiði, er ferðakostnaður ráðherra ekki hluti af þessari samantekt.
Kostnaðarliðir vegna ferða þingmanna erlendis sem gefnir eru upp í tölum á heimasíðu Alþingis eru flugferðir utanlands, gisti- og fæðiskostnaður utan lands, dagpeningar og annar ferðakostnaður utan lands. Um þessa liði segir á heimasíðu Alþingis:
Flugferðir utan lands: Alþingi greiðir kostnað við flugferðir þingmanna á fundi erlendis og er að jafnaði gengið frá farseðlakaupum um 30 dögum fyrir fund til að tryggja hagkvæmni í innkaupum og er þá miðað við kaup á farseðlum á almennu farrými.
Gisti- og fæðiskostnaður utan lands: Fullir dagpeningar samkvæmt úrskurði ferðakostnaðarnefndar eru lagðir inn á reikning þingmanns á brottfarardegi eða næsta virkan dag á eftir. Þingmenn greiða gistikostnað af dagpeningum sem og ferðir til og frá flugvöllum heima og erlendis. Þingmönnum er heimilt að senda hótelreikninga til fjármálaskrifstofu eftir hverja utanferð til uppgjörs. Fari gistikostnaður yfir helming dagpeninga fá þeir mismuninn greiddan.
Dagpeningar: Þingmenn fá dagpeninga við upphaf ferðar en við uppgjör ferðakostnaðar fer eftir reglum nr.1/2009 og njóta þingmenn sömu kjara og ráðherrar og forseti Hæstaréttar (sbr. 9. lið reglnanna), þ.e. 2/3 dagpeninga, auk gistikostnaðar, en greiða staðgreiðslu af því sem er umfram hálfa dagpeninga.
Kostnaðarliðurinn annar ferðakostnaður utan lands er hins vegar ekki skilgreindur nánar.
Hér á eftir fer, í öfugri röð, listi yfir þá 10 þingmenn sem báru mestan kostnað, fyrir Alþingi, vegna vinnuferða til annarra landa, á fyrri helmingi þessa árs. Þeir þingmenn sem taka mikinn þátt í alþjóðastarfi eru einna fyrirferðarmestir á listanum.
Ferðakostnaður Hönnu Katrínar skiptist með eftirfarandi hætti:
Flugferðir: 627.710
Dagpeningar: 551.023
Gisti- og fæðiskostnaður: 64.728
Hanna Katrín fór í alls 6 ferðir erlendis frá janúar og fram til loka júní á þessu ári: Til Stokkhólms á janúarfundi Norðurlandaráðs, til Brussel á fund fastanefndar þingmannaráðstefnu Eystrasaltssvæðisins (fyrir Norðurlandaráð), til Þórshafnar og Osló í fræðsluferð atvinnuveganefndar Alþingis, til Tallinn á ráðstefnu Eystrasaltsþingsins um tengsl Austur- og Vestur-Evrópu, til Stralsund í Þýskalandi á fund fastanefndar þingmannaráðstefnu Eystrasaltssvæðisins (fyrir Norðurlandaráð) og loks til Þrándheims á sumarfund forsætisnefndar Norðurlandaráðs.
Ferðakostnaður Berglindar Óskar skiptist með eftirfarandi hætti:
Dagpeningar: 731.979
Flugferðir: 383.050
Gisti- og fæðiskostnaður: 290.781
Berglind Ósk fór í 3 ferðir á tímabilinu: Til Strassborgar á þingfund Evrópuráðsþingsins, til New York á fund kvennanefndar Sameinuðu þjóðanna en samkvæmt heimasíðu þingsins stóð sá fundur frá 10. febrúar til 5. mars en ekki kemur fram hvort Berglind Ósk var á fundinum allan þennan tíma. Loks fór Berglind Ósk í mars til Bahrain á vorþing Alþjóðaþingmannasambandsins (IPU).
Ferðakostnaður Njáls Trausta skiptist með eftirfarandi hætti:
Dagpeningar: 848.283
Flugferðir: 624.910
Gisti- og fæðiskostnaður: 49.341
Annar ferðakostnaður utan lands: 11.000
Njáll Trausti fór í 5 ferðir erlendis á fyrstu 6 mánuðum ársins: Til Bretlands í fræðsluferð umhverfis- og samgöngunefndar Alþingis, til Brussel á febrúarfundi Nato-þingsins, til Osló á stjórnarnefndarfund NATO-þingsins, til Washington og New York í nefndarferð utanríkismálanefndar og loks til Lúxemborgar á vorfund Nato-þingsins.
Ferðakostnaður Gísla Rafns skiptist með eftirfarandi hætti:
Dagpeningar: 631.441
Flugferðir: 579.291
Gisti- og fæðiskostnaður: 401.929
Annar ferðakostnaður utan lands: 11.000
Gísli fór í 5 ferðir til útlanda á tímabilinu: Til Brussel og Genf á fund þingmannanefndar EFTA, til Þórshafnar og Osló í fræðsluferð atvinnuveganefndar Alþingis, til Strassborgar á fund þingmannanefndar EES, til Washington og New York í nefndarferð utanríkismálanefndar Alþingis og loks til Liechtenstein á fund þingmanna og ráðherra EFTA.
Ferðakostnaður Lilju Rannveigar skiptist með eftirfarandi hætti:
Gisti- og fæðiskostnaður: 749.864
Flugferðir: 471.321
Dagpeningar: 446.196
Lilja Rannveig fór í 3 ferðir erlendis á fyrri helmingi ársins: Til Vínar á vetrarfund þings Öryggis- og samvinnustofnunar Evrópu (ÖSE), til New York á fund kvennanefndar Sameinuðu þjóðanna (á sama fund og Berglind Ósk) en ekki kemur fram hversu lengi hún var á fundinum sem sagður er hafa staðið í tæpar 3 vikur og loks fór Lilja Rannveig á ársfund þings ÖSE í Vancouver.
Ferðakostnaður Diljár Mistar skiptist með eftirfarandi hætti:
Dagpeningar: 686.152
Flugferðir: 563.047
Gisti- og fæðiskostnaður: 486.465
Annar ferðakostnaður utan lands: 11.000
Diljá Mist fór í 6 ferðir erlendis á tímabilinu sem um ræðir: Til Brussel og Genf á fund þingmannanefndar EFTA, til Stokkhólms á þingmannaráðstefnu um sameiginlega utanríkis- og öryggismálastefnu ESB, til Strassborgar á fund þingmannanefndar EES, til Washington og New York í nefndarferð utanríkismálanefndar Alþingis, til Brussel á ársfund Samtaka kvenleiðtoga (WPL) og loks til Liechtenstein á fund þingmanna og ráðherra EFTA.
Ferðakostnaður Þorgerðar Katrínar skiptist með eftirfarandi hætti:
Flugferðir: 808.056
Dagpeningar: 640.976
Gisti- og fæðiskostnaður: 295.013
Annar ferðakostnaður utan lands: 11.000
Þorgerður Katrín fór í 4 ferðir til útlanda á fyrstu 6 mánuðum ársins: Til Strassborgar á fund þingmannanefndar EES, til Washington og New York í nefndarferð utanríkismálanefndar Alþingis, til Nýju Delí á fund framkvæmdastjórnar þingmannanefndar EFTA og loks til Liechtenstein á fund þingmanna og ráðherra EFTA.
Ferðakostnaður Jóhanns Friðriks skiptist með eftirfarandi hætti:
Dagpeningar: 1.215.531
Flugferðir: 797.431
Gisti- og fæðiskostnaður: 135.078
Jóhann Friðrik fór í 6 utanlandsferðir á tímabilinu sem um ræðir: Til New York og Washington á sameiginlegan fund Alþjóðaþingmannasambandsins (IPU) og Sameinuðu þjóðanna og norrænnan samráðs- og upplýsingafund, til Stokkhólms á þingmannaráðstefnu um sameiginlega utanríkis- og öryggismálastefnu ESB, til Bahrain á vorþing Alþjóðaþingmannasambandsins (IPU), til Washington og New York í nefndarferð utanríkismálanefndar Alþingis, til Stokkhólms á COSAC – Fund Evrópunefnda þjóðþinga ESB og loks til Lúxemborgar á vorfund Nato-þingsins.
Ferðakostnaður Þórhildar Sunnu skiptist með eftirfarandi hætti:
Dagpeningar: 1.980.445
Flugferðir: 746.203
Gisti- og fæðiskostnaður: 771
Þórhildur Sunna fór í 5 ferðir erlendis á fyrstu 6 mánuðum ársins: Til Strassborgar í janúar á þingfund Evrópuráðsþingsins, til Parísar í mars en í þeirri ferð sat hún fundi jafnréttisnefndar, eftirlitsnefndar, og laga- og mannréttindanefndar Evrópuráðsþingsins, til Strassborgar í apríl á þingfund Evrópuráðsþingsins, til Sviss 9-10. maí á ráðstefnu Evrópuráðsþingsins um kosningar á viðsjárverðum tímum og í kjölfarið til Tyrklands 11-15. maí vegna kosningaeftirlits Evrópuráðsþingsins, og loks til Kýpur á fund laga- og mannréttindanefndar Evrópuráðsþingsins.
Ferðakostnaður Bjarna skiptist með eftirfarandi hætti:
Dagpeningar: 1.534.466
Flugferðir: 1.093.381
Gisti- og fæðiskostnaður: 385.059
Bjarni fór í alls 7 ferðir út fyrir landsteinana á fyrstu 6 mánuðum ársins: Til Strassborgar, 23.-27. janúar, á þingfund Evrópuráðsþingsins og í kjölfarið 29.- 30. janúar til Stokkhólms á COSAC – formannafund Evrópunefnda þjóðþinga ESB, til Kænugarðs vegna heimsóknar formanna utanríkismálanefnda þjóðþinga Evrópuríkja til Úkraínu (Bjarni var formaður utanríkismálanefndar Alþingis en hefur nú látið af þeirri formennsku), til Haag á fundi framkvæmdastjórnar og stjórnarnefndar Evrópuráðsþingsins, til Washington og New York í nefndarferð utanríkismálanefndar Alþingis, til London á fund formanna utanríkismálanefnda þjóðþinga nokkurra Evrópuríkja, til Strassborgar í apríl á þingfund Evrópuráðsþingsins og loks til Riga á fund framkvæmdastjórnar og stjórnarnefndar Evrópuráðsþingsins.
