Politiken skýrir frá þessu og hefur eftir Egede að gagnrýnin beinist ekki eingöngu að Danmörku heldur að allri þeirri byggingu sem norræn samvinna er orðin, „þar eru lið 1 og lið 2“.
„Það eru í raun starfshættir þessara fimm norrænu þjóðríkja sem eru ekki í takt við tímann og nú er nóg komið,“ sagði Egede í samtali við Politiken.
Hann benti á að leiðtogafundurinn hafi snúist um stöðuna í og við Norður-Atlantshaf. Það sé efni þar sem ekki sé hægt að sniðganga Grænland sem þeki um 20% af svæðinu.
Johannesen sagðist sammála orðum Egede um lið 1 og lið 2.
Hann sagðist einnig telja að Færeyjar séu mikilvægur hluti af Norðurheimskautasvæðinu og Norður-Atlantshafi.
„Við sjáum að bandarísk herskip og kafbátar koma nú reglulega í hafnirnar okkar. Þess vegna er eðlilegt að við sitjum við borðið þegar meðal annars er rætt um öryggismál á okkar svæði við nánasta bandamann okkar,“ sagði hann.