Þetta er umræða sem nú á sér stað í Bandaríkjunum. Hún kann að virðast undarleg en samt sem áður fer hún fram þessa dagana.
Hún hófst í vinsælum morgunþætti, The View, og í kjölfarið fór hún á mikið flug á samfélagsmiðlum.
Nú ræða sumir af helstu lögspekingum landsins hvað gerist ef Trump verður dæmdur í fangelsi en hyggst samt sem áður taka slaginn í forsetakosningunum og heyja kosningabaráttu sína úr fangaklefa. Og ekki bara það. Þeir ræða einnig hvað gerist ef hann sigrar í forsetakosningunum. Getur hann þá orðið forseti?
Forseti Bandaríkjanna hefur fulla heimild til að náða fólk. En spurningin er hvort hann geti náðað sjálfan sig? Enginn forseti hefur reynt að gera það og spurningin er því enn sem komið er fræðileg.
Ekki síst vegna þess að stjórnarskráin segir ekkert um sjálfsnáðun forseta að sögn Mark Tuschnet, prófessors í stjórnarskrármálum við Harvard háskólann. Í samtali við CBC News sagði hann spurningunni hafi ekki verið svarað og líklega séu mismunandi sjónarmið uppi meðal lögfræðinga um þetta.