Helga Vala Helgadóttir, þingmaður Samfylkingarinnar, er allt annað en hrifin af þingmannafrumvarpi Guðrúnar Hafsteinsdóttur, þingmanns Sjálfstæðisflokksins og verðandi ráðherra. Frumvarpið, sem Guðrún leggur fram ásamt Sjálfstæðisþingmönnunum Vilhjálmi Árnasyni og Ásmundi Friðrikssyni, snýr að að breytingu á erfðafjárlögum þannig að foreldrar geti arfleitt börn sín að 10 milljónum króna sem yrði undanþeginn erfðafjárskatti. Þannig gæti hvert barn fengið 10 milljónir króna frá hverju foreldri, alls 20 milljónir króna.
Í frétt Morgunblaðsins í morgun sagði Guðrún að erfðafjárskattur væri að sínu mati of hár og ósanngjarn. Yrði frumvarpið að veruleika gætu foreldrar greitt fyrirframgreiddan arf til barna sinna á allt að tíu árum og það gæti hjálpað afkvæmunum við fasteignakaup. Virðist Helga Vala sérstaklega ósátt við þá skoðun Guðrúnar að um sé að ræða lágar fjárhæðir sem margir gætu nýtt sér.
„Því miður virðast sumir þingmenn lifa í einhverjum hliðarveruleika. Ég vona að börnin mín haldi ekki að það sé alvanalegt að foreldrar eigi 10 milljónir til að gefa hverju barni í fasteignakaup. Það er algjör undantekning og ég tel okkur þingmenn eiga fyrst og fremst að starfa fyrir almenning ekki fáa auðuga. Þar eiga okkar áherslur að liggja,“skrifar Helga Vala.
Bendir hún á greinargerð með frumvarpinu þar sem að áréttað sé að ef foreldrar ákveði að gefa barni sínu 100 milljónir þá muni börnin þurfa að greiða skatt af 90 milljónum króna.
„Þá kemur líka fram að þessi gjöf kemur ekki til frádráttar við uppgjör dánarbúsins í lokin. Ég get ekki skilið það öðru vísi en svo að foreldrar geti ákveðið að gefa einu barna sinna (lagasetning fyrir uppáhaldsbarnið) fjármuni sem ekki komi til frádráttar í heildarútgreiðslu úr búi. Mikið er ég fegin að þetta er þingmannafrumvarp stjórnarliða (og mögulega verðandi ráðherra) en ekki stjórnarfrumvarp. Þá eru minni líkur á að þetta mál verði að veruleika,“ skrifar Helga Vala.