Fljótlega verður frískólanum Cordoba, sem er í Kista í norðurhluta Stokkhólms, lokað. Nemendurnir 500 munu ekki fá að koma aftur eftir jólafríið og það er góð ástæða fyrir því.
Menntamálayfirvöld hafa ákveðið að afturkalla starfsleyfi skólans eftir að hafa fengið upplýsingar frá öryggislögreglunni Säpo um að meðal stjórnenda skólans séu aðilar sem tengjast öfgasinnuðum og ofbeldishneigðum íslömskum öfgasinnum.
Lotta Edholm, menntamálaráðherra, hefur fyrirskipað rannsókn á frískólum landsins, frískólar eru í raun einkaskólar sem njóta ákveðins fjárhagslegs stuðnings frá hinu opinbera. Það hefur vakið áhyggjur margra að Cordobaskólanum verður lokað og óttast fólk um framtíð sænska menntakerfisins, sem er heimsþekkt, með sína tæplega 4.000 frískóla.
Ekki hafa verið veittar miklar upplýsingar opinberlega um af hverju skólanum verður lokað en Fredrik Hulgtgren-Friberg, talsmaður Säpo, hefur þó látið hafa eftir sér að fulltrúar skólans hafi verið í sambandi við „íslamista sem styðja ofbeldisverk“.
Það að skólanum sé lokað er nýjasti kaflinn í uppgjöri sem á sér stað í Svíþjóð þar sem yfirvöld standa nú í harðri baráttu við að koma í veg fyrir öfgahyggju og hryðjuverk. Hér áður fyrr stærðu Svíar sig af að vera stórveldi á sviði mannúðar og hugsjóna og alþjóðleg fyrirmynd umburðarlyndis og með rými fyrir alla. En nú er öldin önnur og Svíar standa frammi fyrir stærsta vandamáli sínu síðan í síðari heimsstyrjöldinni.
Jótlandspósturinn bendir á að Svíar standi nú frammi fyrir ógnum á þremur vígstöðvum. Þetta eru hryðjuverk íslamskra öfgamanna, Rússland sem vill ekki að Svíar fái aðild að NATO og öldu skot- og sprengjuárása þar sem glæpagengi, með múslímskan bakgrunn, berjast um yfirráðin yfir fíkniefnamarkaðnum. Óttast margir að þessi glæpagengi geti verið uppspretta nýrra liðsmanna íslamskra öfgahópa.