Þórdís Anna Oddsdóttir hefur verið ráðin framkvæmdastjóri fjármála hjá 66°Norður og hefur þegar hafið störf. Hún kemur til 66°Norður frá Landsvirkjun þar sem hún hefur starfað sem forstöðumaður fjárstýringar síðan í árslok 2021. Fyrir það starfaði Þórdís í fyrirtækjaráðgjöf Kviku banka og þar hjá Icelandair sem forstöðumaður tekjustýringar hjá flugfélaginu.
Þórdís er með MS gráðu í iðnaðarverkfræði frá Georgia Institute of Technology í Atlanta, Bandaríkjunum og BS gráðu í vélaverkfræði frá Háskóla Íslands. Hún hefur einnig lokið prófi í verðbréfaviðskiptum.
,,Það eru virkilega spennandi tímar fram undan hjá 66°Norður og ógrynni af tækifærum. Ég hlakka til að taka þátt í áframhaldandi vexti félagsins í hópi úrvals samstarfsfólks,“ segir Þórdís.
,,Það er ánægjuefni að fá Þórdísi í stjórnendateymi félagsins en hún býr yfir mikilli reynslu af fjármálamörkuðum, bæði hér heima og erlendis, sem mun nýtast vel við eflingu fyrirtækisins á alþjóðlegum mörkuðum á komandi árum,“ segir Helgi Rúnar Óskarsson, forstjóri 66°Norður.
Sjóklæðagerðin hf. / 66°Norður er eitt elsta framleiðslufyrirtæki landsins og var stofnuð árið 1926 með það fyrir augum að framleiða skjólgóðan fatnað fyrir íslenska sjómenn.
Í dag rekur 66°Norður 13 verslanir í þremur löndum ásamt vefverslunum. Einnig starfrækir fyrirtækið tvær verksmiðjur í Lettlandi. Hjá félaginu starfa um 400 manns í Evrópu og N-Ameríku.
