Staðan í heimsmálunum er verri og ófyrirsjáanlegri nú en nokkru sinni síðan í síðari heimsstyrjöldinni. Þetta sagði Jamie Dimon, forstjóri JPMorgan Chase, í samtali við The Sunday Times. Hann sagði að bandarískt efnahagslíf standi enn vel að vígi en sú geopólitíska staða, sem uppi er, sér mjög alvarleg og líklega sú alvarlegasta síðan 1938.
„Það sem er að gerast núna, eru mikilvægustu atburðirnir varðandi framtíð heimsins hvað varðar frelsi, lýðræði, mat, orku og fólksflutninga. Við horfum framhjá þýðingu þessara atburða þegar við spyrjum hvað þetta þýði fyrir markaðina,“ sagði Dimon.
Ef þú fyllist svartsýni við að lesa um sýn Dimon á heiminn þá skaltu hætta að lesa hérna því Larry Fink, forstjóri Blackrock, sem er stærsti fjárfestingarsjóður heims, er ekki bjartsýnni en Dimon. Hann telur að stríðið í Úkraínu og stríð Ísraels og Hamas eigi sinn þátt í að ýta bandaríska hagkerfinu, sem er það stærsta í heimi, nær samdrætti.
Hann sagði að geopólitísk áhætta skipti miklu varðandi mótun lífs okkar allra. Það sé vaxandi ótti í heiminum og minni von. Vaxandi ótti geri að verkum að fólk dragi úr neyslu. Ótti valdi því samdrætti til langs tíma litið og ef óttinn haldi áfram að vaxa, þá aukist líkurnar á samdrætti í Evrópu sem og Bandaríkjunum.