Isavia hefur krafist þess að greniskógurinn í Öskjuhlíð verði felldur eða grisjaður vegna flugöryggis. Margir hafa orðið til að mótmæla og talað um mikilvægi og fegurð þessa útivistarsvæðis. Venjulega er þar á ferð fólk sem aldrei hefur gengið á þennan torfæra hól í miðborg Reykjavíkur.

Á liðinni öld gekk yfir landið mikið skógræktaræði. Menn lásu í Landnámu að landið  hafi verið klætt skógi en skammsýnir fornmenn hoggið trén í eldivið. Til að leiðrétta þennan verknað voru fengnar til landsins milljónir greniplantna frá Noregi. Þessum ófögnuði var plantað bæði skipulagslaust og gagnrýnislaust. Menn gengu jafnvel svo langt í dellunni og grenitrjám var plantað á sjálfum Þingvöllum og víðar á viðkvæmum svæðum. Í Hlíðahverfi og Laugarásnum í Reykjavík ríkti sannkallað grenitrjáablæti eins og í Öskjuhlíð. Trjáplöntum var dritað útum allt með þeim afleiðingum að upp óx skelfilegur grenitrjáaskógur í byggð. Þessi tré hafa náð ótrúlegri hæð og verða ljótari með hverju árinu og skyggja á allt útsýni. Skógurinn í Öskjuhlíð hefur fengið að vaxa óáreittur og ógrisjaður svo að hann er orðinn að villigróðri sem nýtist engum nema kanínum í æxlunarleik. Fólk getur ekki stundað neina útivist í þessum skógi vegna þess hversu óhaminn og þéttur hann er. Hann keyrir í kaf allar sögulegar minjar í Öskjuhlíð.

Ég er því hjartanlega sammála að fella þennan forljóta greniskóg. Síðan þarf að höggva grenitré um allt land og byrja á því að frelsa Þingvelli úr ánauð norskra trjáræktarsjónarmiða. Einu sinni var sagt um fyrirbæri sem engan veginn passaði inn í umhverfi sitt: „Þetta er eins og sjá fjallkonuna í þjóðbúningi og klofstígvélum.“ Tími er kominn til að klæða Öskjuhlíðina, Þingvelli og fleiri náttúruperlur úr þessum forljótu klofstígvélum og koma í veg fyrir meiri landspjöll og hermdarverk skógræktarmanna.