Eins og skýrt var frá í gær þá er Guðlaugur Þór Þórðarson sagður ætla að bjóða sig fram gegn Bjarna Benediktssyni þegar kosið verður um formann Sjálfstæðisflokksins á landsfundi hans um aðra helgi.
[embed]https://www.dv.is/eyjan/2022/10/26/segja-stadfest-ad-gudlaugur-thor-aetli-i-formannsframbod-gegn-bjarna-ben/[/embed]
Bjarni segir að Guðlaugur Þór hafi ekki rætt við hann um mótframboð og enn sem komið er hafi enginn annar en hann sjálfur lýst yfir framboði.
Þetta kemur fram í viðtali við Bjarna í Dagmálum Morgunblaðsins.
Hann sagðist vilja endurnýja umboð sitt sem formaður flokksins á landsfundinum og sagðist telja það skipta máli fyrir flokkinn og þátttöku hans í ríkisstjórnarsamstarfi.
Hvað varðar hugsanlegt framboð Guðlaugs Þórs sagði Bjarni: „Ég geng aldrei út frá neinu sem vísu varðandi landsfund, að það sé enginn sem vilji láta reyna á sitt umboð. En Guðlaugur hefur ekki lýst yfir neinu framboði, þannig að eftir því sem mér sýnist er enginn annar sem hefur formlega stigið fram. Formaður á ekki embættið, hann þarf að endurnýja umboðið á hverjum landsfundi og mér finnst það góð regla, mér finnst hún vera holl. Ég tek ekkert sem sjálfsagt í því og það eru allir landsfundarfulltrúar í kjöri. Maður þarf að vinna fyrir endurnýjuðu umboði á milli funda og maður þarf að koma á fundinn með sýn fyrir flokkinn inn í framtíðina. Það á við um þennan fund eins og alla aðra.“
Hann sagðist telja óskynsamlegt að hræra í flokksforystunni eins og staðan er núna: „Með flokkinn í ríkisstjórn og eitt ár búið af kjörtímabilinu kæmi mér það spánskt fyrir sjónir að menn vildu skipta í forystunni,“ sagði hann.
