Fréttablaðið skýrir frá þessu. Fram kemur að upphaflega hafi slitastjórn Landsbankans stefnt fyrrverandi bankastjórum hans og fjölmörgum tryggingafélögum vegna starfsábyrgðartryggingar stjórnendanna og krafist 40 milljarða króna greiðslu vegna skaða sem bankastjórarnir hefðu valdið bankanum í aðdraganda hrunsins 2008.
Hluta af málinu lauk með dómi Landsréttar sem sýknaði tryggingafélögin og Halldór J. Kristjánsson af kröfu LBI ehf. Í framhaldi af þeim dómi óskaði LBI ehf. að málið yrði fellt niður.
Fréttablaðið segir að Sigurður G. Guðjónsson, lögmaður Sigurjóns Þ. Árnasonar, fyrrum bankastjóra Landsbankans, hafi sagt að Sigurjón sé eini bankamaðurinn á Íslandi sem hafi verið dæmdur til að greiða fyrrum vinnuveitanda sínum 200 milljónir króna og blasi fátt annað en gjaldþrot við honum.
Lögmenn komu í Héraðsdóm Reykjavíkur í gær og ræddu verðlagningu vinnu sinnar. Sagði Sigurður að eðlilegt væri að Sigurjóni yrðu úrskurðaðar tvær til þrjár milljónir í kostnað vegna þeirrar vinnu sem þurfti að leggja í og ætti slitastjórn að greiða þennan kostnað. Hilmar Magnússon, lögmaður Halldórs, hafði sams konar kröfu uppi.
Lögmaður Landsbankans, Kristinn Bjarnason, sagði að þau skjöl sem tilheyrðu þessum hluta málsins hefðu komið fram áður og efaðist hann um að lögmennirnir hefðu þurft að leggja í þá vinnu sem kröfur þeirra endurspegluðu og mættu þeir taka eitt núll af.