Í janúar fór Liz Cheney, þingmaður Repúblikanaflokkins í fulltrúadeild Bandaríkjaþings, gegn stefnu flokksins þegar hún greiddi atkvæði með því að Donald Trump yrði stefnt fyrir ríkisrétt. Margir kröfðust þess að henni yrði vikið úr stjórn flokksins en þá atlögu stóð hún af sér á öruggan hátt á miðvikudagskvöldið þegar þingmenn flokksins í fulltrúadeildinni greiddu atkvæði um málið.

145 studdu áframhaldandi veru hennar í forystunni en 61 var á móti. CNN skýrir frá þessu.

Cheney var hæst setti Repúblikaninn sem studdi ákæru á hendur Trump en tíu þingmenn flokksins í fulltrúadeildinni greiddu atkvæði með ákæru. Áður en þingmennirnir gengu til atkvæðagreiðslu sagði Cheney að hún ætlaði ekki að biðjast afsökunar á hvernig hún hefði greitt atkvæði.

Heimildarmaður, sem var á fundinum, sagði CNN að leiðtogi Repúblikana í fulltrúadeildinni, Kevin McCarthy styðji Cheney og það geri hinn áhrifamikli Steve Scalise einnig.

Cheney er þriðji valdamesti Repúblikaninn í fulltrúadeildinni en hún er dóttir Dick Cheney, fyrrum varaforseta.