Í dag ganga Bandaríkjamenn að kjörborðinu og kjósa sér forseta til næstu fjögurra ára. Þeir kjósa einnig til þings og um eitt og annað í hinum ýmsu ríkjum. Talningu atkvæða í forsetakosningunum er lokið í Dixville Notch í New Hampshire. Joe Biden fékk öll greidd atkvæði.

Tólf búa í bænum og fimm greiddu atkvæði. Það tók því ekki langan tíma að telja atkvæðin sem féllu öll í hlut Biden.

Skömmu eftir að þessi niðurstaða lá fyrir lauk talningu atkvæða í nágrannabyggðinni Millsfield en þar greiddi 21 atkvæði. Donald Trump fékk 16 og Joe Biden 5.

Þessar niðurstöður eru væntanlega ekki ávísun á niðurstöður kosninganna í ríkinu eða landinu í heild en kastljósið beinist venjulega að þessum tveimur byggðarlögum á kjördegi þar sem kosningu og talningu atkvæða lýkur fyrst þar.