Fyrir fjórum árum taldi bandaríska alríkislögreglan FBI að Rússar hefðu haft afskipti af forsetakosningunum þar sem Donald Trump og Hillary Clinton tókust á um forsetaembættið. Nú telja leyniþjónustustofnanir að bæði Rússar og Íranir hafi blandað sér í kosningarnar og reyni að hafa áhrif á niðurstöðu þeirra.

John Ratcliffe, forstjóri leyniþjónustustofnana Bandaríkjanna (National Intelligence), sagði þetta á fréttamannafundi í Washington í gærkvöldi. Hann sagði að Rússar og Íranir hafi gripið til ákveðinna aðgerða til að hafa áhrif á skoðanamyndun kjósenda. CNBC skýrir frá þessu.

National Intelligence hefur yfirumsjón og ber ábyrgð á starfsemi 17 leyniþjónustustofnana í Bandaríkjunum, þar á meðal CIA.

Ratcliffe sagði að Íranir og Rússar hafi komist yfir gögn um bandaríska kjósendur. Hann sagði að Íranir hafi notað þessar upplýsingar til að senda tölvupósta til kjósenda í mörgum ríkjum Bandaríkjanna. Markmiðið er að hans sögn að hræða kjósendur og reyna að skapa jarðveg fyrir óróa og uppþot.

„Erlend öfl geta notað þessi gögn til að reyna að koma röngum upplýsingum til skráðra kjósenda í þeirri von að vekja ringulreið og öngþveiti og grafa undan lýðræðinu í Bandaríkjunum,“

sagði Ratcliffe sem nefndi engin bein dæmi um aðgerðir Rússa. Hann sagði að Íranir reyni að grafa undan Trump og koma í veg fyrir endurkjör hans. Bandarískar leyniþjónustustofnanir hafa einmitt varað við að Íranir gætu gert eitthvað slíkt og að Rússar myndu reyna að hafa blanda sér í kosningarnar til að tryggja endurkjör Trump.