Sjálfstæðisflokkurinn hefur ferðast hringinn í kring um landið í kjördæmavikunni sem nú stendur yfir, líkt og aðrir flokkar.
Birta þingmenn flokksins myndir og myndbönd úr ferðinni á samfélagsmiðlum. Þar má sjá ræðu frá Bjarna Benediktssyni fjármálaráðherra og formanni flokksins, frá 6. febrúar er hringferðin hófst í miðbæ Reykjavíkur og Hringbraut greinir frá.
Þar ræðir Bjarni Benediktsson um þann vanda sem blasir við vegna lágrar fæðingatíðni hér á landi, sem leiði til þess að heilbrigðiskerfið muni glíma við aukið álag vegna öldrunar þjóðarinnar.
„Við erum að sjá á næstu örfáu árum mjög stórar kynslóðir sem eru fæddar fyrir 1960 koma á lífeyrisaldur. Hugsið ykkur þetta, á næstu fimm árum munu þeir sem eru 67 ára og eldri fjölga um 25 prósent. Það eru 10 þúsund manns sem bætast við sem lífeyrisþegar,“
sagði Bjarni.
Hann nefndi að hann sjálfur hefði lagt sitt af mörkum til að halda uppi fæðingartíðninni:
„Ég er nú búinn að reyna að gera mitt í þeim efnum, en ég get ekki meir. Nú er ég orðinn fimmtugur og þetta er komið ágætt hjá mér.“
Bjarni hugsaði sig síðan aðeins um og bætti við:
„Eða ég get meir, bara svo það sé á hreinu. Bara svo allir séu með það alveg á hreinu,“
sagði Bjarni og uppskar mikil hlátrasköll.
Árið 2018 var frjósemin 1,7 barn á ævi hverrar konu og er það mun lægra hlutfall en undanfarin ár. Hlutfallið á Íslandi hefur löngum verið hærra en í nágrannalöndunum, en er núna á pari. Miðað er við að frjósemi þurfi að vera 2,1 barn til að viðhalda mannfjölda til lengri tíma.
