Oddný G. Harðardóttir, þingflokksformaður Samfylkingarinnar, er ósátt við svör forsætisráðherra varðandi hæfi Kristjáns Þórs Júlíussonar, sjávarútvegsráðherra, vegna Samherjamálsins í Kastljósinu í vikunni, þar sem Katrín sat fyrir svörum:

„Hún sagði okkur að á Íslandi þekktu allir alla og svona. Því væri svo flókið að ræða samband sjávarútvegsráðherra og fyrrum stjórnarformanns Samherja við forstjóra Samherja. Þeir væru æskuvinir – til að mynda. Hver og einn ráðherra þyrfti að meta hæfi sitt.

Ég velti fyrir mér hvers vegna forsætisráðherranum fannst það góð hugmynd við stofnun ríkisstjórnarinnar að fyrrum stjórnarformaður eins stærsta útgerðarfyrirtækis á landinu yrði sjávarútvegsráðherra. Leit það ekki alltaf illa út?”

spyr Oddný.

Þjóni stórútgerðinni

Kristján Þór hefur áður sagst ætla að segja sig frá þeim málum er varða Samherja, þar sem forstjóri Samherja sé æskuvinur hans. Enn hefur þó ekki komið til þess að Kristján hafi sagt sig frá neinu máli vegna mögulegs vanhæfis.

Oddný ýjar þó að vanhæfi Kristjáns Þórs við úthlutun makrílkvótans og vegna reiknireglu veiðigjalda:

„Ætli forsætisráðherrann hafi ekki leitt hugann að hæfi sjávarútvegsráðherrans vegna tillögu hans um úthlutun makrílkvótans sem var hliðholl stórútgerðinni eða við samningu reiknireglu fyrir veiðigjöld sem var líka stórútgerðinni í hag? En kannski er þetta bara allt talið eðlilegt við ríkisstjórnarborðið,”

segir Oddný og minnist á að Katrín hafi stutt Sigríði Á. Andersen í embætti dómsmálaráðherra eftir dóm Mannréttindadómstóls Evrópu í Landsréttarmálinu:

„Formaður Sjálfstæðisflokksins studdi dómsmálaráðherrann og styður sjávarútvegsráðherrann líka, enda studdu þau bæði hann sjálfan, ráðherra skattamála, þegar í ljós kom með Panamaskjölunum að hann hafði nýtt sér skattaskjól. Og svo er það formaður Framsóknarflokksins sem hefur nú áður bent okkur á að það sé flókið að eiga peninga á Íslandi.”