Helmingur landsmanna er andvígur flutningi Reykjavíkurflugvallar úr Vatnsmýri samkvæmt niðurstöðum nýrrar skoðanakönnunar sem Zenter rannsóknir gerðu fyrir Fréttablaðið og frettabladid.is. Tæplega 30 prósent eru hlynnt því að völlurinn verði fluttur, 20 prósent eru hvorki með eða á móti en rúmlega 50 prósent eru andvíg flutning flugvallarins.

Eins og fyrr er andstaðan við flutning flugvallarins meiri á landsbyggðinni en á höfuðborgarsvæðinu. Þá er andstaðan meiri eftir því sem ofar dregur í aldurshópum. Þá er meiri stuðningur við flutning flugvallarins hjá þeim sem eru með meiri menntun og hærri tekjur.

Langmesta andstaðan við flutning vallarins er á meðal stuðningsfólks Miðflokksins, Framsóknarflokksins og Flokks fólksins en hjá stuðingsfólki þessara flokka mælist andstaðan rúmlega 80 prósent.

60 prósent stuðningsfólks Sjálfstæðisflokksins er andvígt flutningi flugvallarins en 22 prósent þess er hlynnt flutningi.

Það er stuðningsfólk Samfylkingarinnar sem einna helst styður flutning vallarins úr Vatnsmýri en 59 prósent þess styðja flutning.