Fréttablaðið skýrir frá þessu í dag. Blaðið segir að ríkislögmaður hafi staðfest að stefnur hafi borist embættinu vegna úthlutunar makrílkvóta en ekki væri búið að þingfesta þær. Blaðið segist hafa heimildir fyrir að stefnurnar séu frá stórum og meðalstórum útgerðum.
Ekki fengust upplýsingar um hversu margar stefnur hafa borist eða upphæð þeirra.
Í byrjun desember á síðasta ári komst Hæstiréttur að þeirri niðurstöðu að ríkið bæri bótaskyldu vegna kvótasetningar á makríl. Huginn ehf. og Ísfélag Vestmannaeyja töldu sig hafa orðið fyrir fjárhagslegu tjóni vegna úthlutunar ríkisins á makrílkvóta.
Fréttablaðið hefur eftir Axel Helgasyni, formanni stjórnar Landssambands smábátaeigenda, að sex fyrirtæki hið minnsta ætli sé að sækja bætur. Haft er eftir honum að makrílkvótinn sé 65 til 100 milljarða virði og því er um háar fjárhæðir að ræða. Hann segist telja að fyrirtækin, sem hyggjast sækja bætur til ríkisins, geti fengið um 35 milljarða.