Á fundi bæjarráðs Akureyrar þann 1. nóvember var rætt um breytingu á heiti Akureyrarkaupstaðar, sem er formlegt heiti bæjarins. Engin ákvörðun var tekin um nafnið, en sviðsstjóra stjórnsýslusviðs, Höllu Margréti Tryggvadóttur, var falið að vinna tillögu í málinu. Vikudagur greinir frá.
Í samtali við Vikudag segir Halla að formlegt heiti bæjarins sé lítið notað, nema helst í ráðuneytunum og hjá Sambandi íslenskra sveitarfélaga:
„Ég tel að margir bæjarbúar átti sig ekki á því að bærinn heiti í raun Akureyrarkaupstaður en ekki Akureyrarbær,“ segir Halla.
Aðspurð hvort ekki liggi beinast við að breyta nafninu í Akureyrarbæ segir hún málið ekki komið á það stig ennþá að ræða nýjar nafnatillögur. Ákveðið verður í hvaða ferli málið fer á bæjarráðsfundi.
Birtur er kafli bókarinnar Úr sögu Akureyrar eftir Jón Hjaltason sagnfræðing, á heimasíðu Akureyrarkaupstaðar. Þar segir um tilurð bæjarins og nafnsins:
„Akureyrar er fyrst getið árið 1562. Þá var kveðinn upp dómur á eyrinni yfir konu sem hafði sængað hjá karli án þess að hafa til þess giftingarvottorð. Það var svo 216 árum síðar, eða 1778, sem fyrsta íbúðarhúsið reis á Akureyri. Aðeins 8 árum seinna varð Akureyri kaupstaður í fyrra sinnið að undirlagi konungs sem vildi með því efla hag Íslands. Íbúar Akureyrar voru þá 12 talsins. Allt fór þetta meira og minna í vaskinn hjá kóngi, enginn vaxtarkippur hljóp í kaupstaðinn og 1836 missti bærinn kaupstaðarnafnbótina og endurheimti hana ekki aftur fyrr en 1862.
Það er viðeigandi tilviljun að nafn Akureyrar er dregið af kornakri sem menn halda fyrir víst að hafi verið í einu gilja bæjarins. (Fleiri skýringar eru til á nafngiftinni en engin álíka skemmtileg og þessi).“