Time skýrir frá þessu. Í kosningunum 2014 kusu aðeins 16 prósent fólks á aldrinum 18 til 24 ára. Kosningaþátttakan var almennt 38,5 prósent í þessum kosningum.
Samtökin March for Our Lives eru meðal þeirra samtaka sem reyna að fá ungt fólk til að mæta á kjörstað. Hreyfingin var stofnuð af ungu fólki sem lifði af skotárás í Parkland í Flórída í febrúar á þessu ári en þar voru 17 skotnir til bana. Þessir ungu menntaskólanemar berjast nú fyrir hertri vopnalöggjöf og ferðast vítt og breitt um Bandaríkin til að ná til kjósenda.
Það skiptir demókrata miklu máli að ná til ungra kjósenda og fá þá til að kjósa. Þeim mun yngra sem fólk er þeim mun meiri líkur eru á að það kjósi demókrata. En þetta er sá þjóðfélagshópur sem er erfiðast að fá til að kjósa. Þegar kjörsókn er lítil er það aðallega vegna þess að kjósendur demókrata hafa ekki skilað sér á kjörstað, aðallega ungt fólk og fólk af latneskum uppruna.
Til að spyrna við fótunum hafa margir ríkisstjórar repúblikana reynt að gera ungu fólki erfiðara fyrir með að kjósa. Í sumum ríkjum hafa þeir til dæmis komið í veg fyrir að námsmenn geti notað stúdendaskírteini sín eins og persónuskilríki á kjörstað. Fyrir nokkrum árum reyndu repúblikanar í Texas að koma í gegn lagabreytingu sem kvað á um að ekki mætti nota stúdentaskírteini sem persónuskilríki en það mátti nota skotvopnaleyfið sem persónuskilríki. Það er nokkuð augljóst hvert markmiðið var með þessu því þeir Bandaríkjamenn sem eru á móti núverandi vopnalöggjöf eru yfirleitt ungt fólk sem oftast kýs demókrata.
Í sumum ríkjum hafa ríkisstjórar repúblikana fækkað kjörstöðum vitandi að það þýðir lengri biðraðir. Þetta er gert í þeirri von að unga fólkið gefist fyrst upp ef það sér fram á langa bið eftir að komast að kjörborðinu.
