Páll Magnússon, þingmaður Sjálfstæðisflokksins, segir að það sé eitthvað að í kerfinu sem þurfi að laga til að ungt fólk sé dæmt til ævilangrar örorku. Í ræðu sinni á Alþingi undir liðnum störf þingsins spurði Páll hvort þingmenn gerðu sér grein fyrir því að 30% öryrkja á Íslandi með 75% örorkumat eða meira séu ungt fólk innan við fertugt, hlutfall sem er tvöfalt hærra en er á hinum Norðurlöndunum þar sem hlutfallið er 14–16%.

Hann bendir á að árið 2016 hafi fjölgun öryrkja farið fram úr fjölgun á vinnumarkaði og að fjölgunin sé mest hjá ungum körlum á aldrinum 20–30 ára vegna geðraskana og ungra kvenna á aldrinum 30–40 ára vegna stoðkerfisvandamála.

Páll bendir á að kostnaður komi til með að tvöfaldast eftir tíu ár þar sem öryrkjar verði orðnir 23 þúsund. Hann segist þó ekki vera að ræða þetta út frá kostnaði hefur mannlega þættinum: „Það er eitthvað að í kerfinu sem er hvetjandi til skráningar inn á örorku, samanborið við það kerfi sem ríkir á hinum Norðurlöndunum, og er letjandi fyrir fólk til að koma til baka. Það er eitthvað í kerfinu sem við verðum að laga, fólksins sjálfs vegna, svo við séum ekki að dæma ungt fólk, unga menn og ungar konur, til varanlegrar og hugsanlega ævilangrar örorku. Við verðum að laga kerfið.“