Risablaðra sem á að sýna Sadiq Khan, borgarstjóra London, hefur verið sett á loft yfir borginni. Var hvorki meira né minna en um 60.000 pundum, andvirði yfir 8 milljónum íslenskra króna, safnað til að gera hugmyndina að veruleika. Blöðrufígúran er íklædd gulu bikini.

Mörgum mislíkaði – og öðrum líkaði prýðisvel – er risablaðra í líki Donald Trump var sett á loft í höfuðborginni á meðan Englandsheimsókn Bandaríkjaforseta stóð. Sadiq Khan og Trump hafa átt í fremur neikvæðum skeytasendingum á samfélagsmiðlum og í gegnum fjölmiðla. Sadiq Khan er upprunalega frá Pakistan og var borgarstjóraefni Verkamannaflokksins er hann var kjörinn borgarstjóri. Margir hafa horn í síðu hans og er hann gagnrýndur fyrir meint slök viðbrögð við sívaxandi glæpatíðni í London en fjölmörg ungmenni hafa látið lífið í hnífaárásum í borginni á undanförum misserum. Khan er múslimi og margir yst til hægri og í hópi þeirra sem berjast gegn íslamisma eru fullir tortryggni í hans garð, meðal annars vegna tengsla hans við hryðjuverkamenn í fyrrum störfum sínum sem mannréttindalögmaður.

Hvatamaðurinn að Sadiq Khan blöðurnni heitir Yanny Bruere. Í viðtali við BBC segir hann að sér hafi mislíkað að Sahiq Khan lagði blessun sína yfir gerð Trump-risablöðrunnar og segir hann að borgarstjórinn hefði aldrei sagt það sama um blöðru af Obama forseta. Bruere harðneitar því að hann hafi tengsl við hægri öfgasamtök en hann er bendlaður við andúð á múslimum og jafnvel gyðingum – nokkuð sem hann þvertekur fyrir.

Þetta risablöðruátak hefur einnig tekið á sig mynd mótmæla gegn ofbeldisglæpum í borginni og meintu aðgerðaleysi borgarstjórans í þeim efnum.

Sadiq Khan tekur þessu uppátæki með stökustu ró. Hann gerir hins vegar í gamansömum tóni athugsemd við gula bikinið og segir að gulur sé ekki sinn litur.