„Hver eru rökin fyrir því að börnin séu í reiðileysi mánudag til fimmtudagsmorguns þessa viku?“ spyr Þorbjörg Helga Vigfúsdóttir fyrrum borgarfulltrúi en í nýlegri færlsu á facebook undrast hún á þeirri ákvörðun skólayfirvalda að hafa skólasetningu í miðri viku.

Þorbjörg Helga bendir á að þessa dagana sé Reykjavíkurborg  með fréttir um ýmislegt á borð við þrif á götum og menningarnótt en á heimasíðu borgarinnar er hins vegar ekkert að finna um fyrirhugaða skólasetningu grunnskólanna sem fram fer í næstu viku. Segist henni fyrirmunað að skilja hvernig skólar og yfirvöld geti ítrekað sett skólasetningar á í miðri viku þegar engin eru námskeið í boði.

„Því til viðbótar er dagurinn sem skólasetning er slitinn algjörlega í sundur. Foreldrar eru löngu búnir með öll frí fyrir árið vegna vetrarfría, starfsdaga og sumarfría og búin að laumast óendanlega oft úr vinnunni til að keyra börnin í allt sumar á milli námskeiða.

Að auki eru sjálf börnin komin með algjört ógeð á misgóðum og misdýrum sumarnámskeiðum – ef á annað borð foreldrar hafa haft efni á að senda þau.“

Þá spyr Þorbjörg hvort ekki sé hægt að hefja skólastarf á mánudegi og hlífa þannig foreldrum við endalausum reddingum og veseni.

„Og svo ég slái nú ykkur alveg út dauðrotuð, gætum við beðið um skólasetningu kl. 08 með börnum svo foreldrar komist í heilan vinnudag?“