Það er uppi fótur og fit vegna þess að hin forðum virðulega menntastofnun, Kaupmannahafnarháskskóli, ætlar að leggja niður kennslu í íslensku, færeysku og forníslensku – og þar fer með það sem kallast gammeldansk og oldnordisk. Þarna fjúka greinar sem hafa verið stundaðar við háskólann í mörg hundruð ár.
Einu sinni var það líka svo að allir alvöru menntamenn í Danmörku höfðu komist í tæri við norrænu í skóla, jafnt og latínu og grísku. Þar er bókmenntaarfur Norðurlanda og þar er líka sagt frá dönskum kóngum.
Þessu er mótmælt víða í dönsku pressunni, helst í greinum sem birtast í nokkuð íhaldssömum blöðum. Færeyingar eru líka mjög ósáttir. Íslenski menntamálaráðherrann, Lilja Alfreðsdóttir, tekur málið upp á fundi með danska menntamálaráðherranum. Ekki er vitað hvort nokkuð sem hönd er á festandi kom út úr því samtali.
Menntamálaráðherrann danski er ekki líklegur til að hafa mikinn áhuga á afskekktum tungum og fornum fræðum. Hann heitir Tommy Ahlers – og kannski mætti lýsa honum best með því að segja að hann sé sölumannstýpa? Fremur óhefðbundinn sem menntamálaráðherra. Hann er ekki nema rétt rúmlega fertugur, frjálshyggjumaður, var um tíma ráðgjafi hjá McKinsey – það er fyrirtæki sem boðar að skera skuli burt allt sem telst vera óhagkvæmt.
Ahlers hefur unnið innan hugbúnaðargeirans og boðar að skólakerfið danska þurfi að taka sig á hvað varðar nýja tækni. Hann sagði eitt sinn að Lars Lökke Rasmundsen forsætisráðherra skilji ekki hvernig peningar verði til því hann hafi aldrei unnið hjá einkaaðilum. Og Ahlers segir um fleiri stjórnmálamenn danska að þeir hafi aldrei þurft að taka sig saman um að búa eitthvað til og selja það.
Maður af þessu tagi er ekki líklegur til að sjá sérstaklega aumur á íslensku, færeysku eða forníslensku. Ef hann þekkir norrænu goðin er það líklega úr tölvuleikjum.
En Íslendingar gætu hæglega svarað í sömu mynt með því að hætta að kenna dönsku í skólum hér. Það væri mjög auðveldlega hægt að sleppa því frá og með næsta hausti. Það enskuskotna tungumál sem við heyrum koma djúpt úr koki fólks á götum Kaupmannahafnar er reyndar ansi langt frá dönskunni sem kennd er í skólum á Íslandi.