Fyrir Heimaey, nýja framboðið í Vestmannaeyjum sem náði inn þremur mönnum í bæjarstjórn í nýliðnum kosningum, fundar með Eyjalistanum í dag. Íris Róbertsdóttir, oddviti Fyrir Heimaey, segir í samtali við Fréttablaðið í dag að fyrsta verk sé að ræða við Eyjalistann. Aðeins sex atkvæðum munaði að Sjálfstæðisflokkurinn, sem haldið hefur hreinum meirihluta síðastliðin 12 ár með Elliða Vignisson í fararbroddi, næði að halda meirihlutanum. Sjálfstæðismenn í bænum lýstu því yfir að þeir yrðu í minnihluta ef þeir næðu ekki hreinum meirihluta. Allt bendir því til að Íris verði nýr bæjarstjóri í Vestmannaeyjum.
Fyrir Heimaey heggur stórt skarð í bæði Sjálfstæðisflokkinn og Eyjalistann, Sjálfstæðismenn töpuðu tveimur mönnum af fimm og Eyjalistinn fór úr tveimur bæjarfulltrúum niður í einn. Framboðið á rætur að rekja til deilna innan Sjálfstæðisflokksins í bænum um áramótin.
Sjá einnig: Dularfullur listi í umferð í Vestmannaeyjum
Elliði Vignisson, fráfarandi bæjarstjóri, sagði í samtali við Stöð 2 í gærkvöldi að hann væri sáttur. Hann væri búinn að taka til á skrifborðinu og hann hefði engar áhyggjur af framtíðinni.
Meirihluti Sjálfstæðisflokks og Bjartrar framtíðar/Viðreisnar hélt í Kópavogi, Sjálfstæðisflokkurinn fékk 5 kjörna og Björt framtíð/Viðreisn tvo af ellefu. Samkvæmt Morgunblaðinu eru engar viðræður hafnar, flokkarnir höfðu þó lýst yfir áhuga að halda samstarfinu áfram.
