Miðflokkurinn er fullur af þjóðlegheitum. Hann leggur til, og þykir það brýnt mál, að íslenski fáninn sé við hún á Alþingishúsinu, Stjórnarráðinu og húsi Hæstréttar alla daga frá morgni til kvölds. Þingmenn Flokks fólksins eru með eins og sjá má á lista yfir flutningsmenn frumvarps til laga þessa efnis.
Miðflokkurinn og einn þingmaður Flokks fólksins hafa líka lagt fram frumvarp um að 1. desember verði lögbundinn frídagur. Þetta þykir þeim við hæfi á 100 ára afmæli fullveldisins. Þarna myndi semsagt bætast við einn frídagur.
Það er viðkvæði sem heyrist oft að 1. desember sé vanmetinn dagur, að við séum búin að gleyma honum og tilefninu – en þetta yrði rækileg áminning.
Þeir sem eru ekki jafn þjóðlega sinnaðir benda á að best væri að hafa frídaga sem næst helgum svo fólk fái almennileg frí. En þá þarf náttúrlega að fara að hnika til tylli- og helgidögum sem varla þykir viðeigandi. En frí-fimmtudagarnir á vorin eru til dæmis hálf vandræðalegir.
En svo mætti jafnvel bæta um betur og gera 28. janúar að almennum frídegi. Hvers vegna þá? Jú, sökum þess að þann dag 2013 sýknaði EFTA-dómstóllinn íslenska ríkið af öllum kröfum ESA í Icesave málinu. Það er semsé Icesave dagurinn.
Annars fékk Miðflokkurinn smá ágjöf núna í vikunni. Einn þingmaður flokksins, Birgir Þórarinsson, skrifaði grein í Morgunblaðið þar sem hann tók mjög eindregið undir málflutning vestrænna ríkja gegn Pútín Rússlandsforseta og varaði sterklega við íhlutun Rússa.
Birgir segir að Rússar ógni friði og öryggi:
Óskastaðan í Kreml er sú að samstaða ríkja innan ESB og NATO liðist í sundur. Framkoma Rússa er vel skipulögð ógn við frið og öryggi í Evrópu. Henni verður að mæta af hörku. Alþingi þarf að vera vel upplýst um stöðu og þróun mála og taka hlutverk sitt alvarlega, með því að efla Íslandsdeild NATO-þingsins.Pútín hefur ekki sagt sitt síðasta orð.
Þetta mæltist misjafnlega fyrir á alnetinu og meðal annars hjá fólki sem segist kjósa Miðflokkinn. Vigdís Hauksdóttir sá sig knúða til að grípa inn í og segja að þetta sé ekki endilega stefna flokksins.