Hæstaréttardómarinn Benedikt Bogason hefur stefnt Jóni Steinari Gunnlaugssyni, fyrrverandi hæstaréttardómara, fyrir meiðyrði í nýútkominni bók hans: „Með lognið í fangið – um afglöp Hæstaréttar eftir hrun“.

Þetta kom fram í fréttum RÚV í kvöld.  Í bókinni fullyrðir Jón Steinar að Hæstiréttur hafi framið dómsmorð á Baldri Guðlaugssyni, fyrrverandi ráðuneytisstjóra, sem hlaut tveggja ára fangelsisdóm í Hæstarétti fyrir innherjasvik og brot í opinberu starfi, árið 2012.

Einn dómara í málinu var Benedikt Bogason, sem krefst nú ómerkingar vegna ærumeiðandi ummæla, sem í þessu tilfelli eru orðið „dómsmorð“ en það er skilgreint sem: „…dráp af ásettu ráði, þar sem réttarfarið verður að morðtólinu,“ segir Jón Steinar í bók sinni, með vísun til gamallar skilgreiningar. Að auki er orðið skilgreint með þeim hætti, að þau lögmál sem gildi um vandaðan málarekstur séu brotin, til þess að komast megi að rangri niðurstöðu.

Að sögn RÚV krefst Benedikt þess að fimm ummæli í bókinni verði dæmd dauð og ómerk, en málið verður þingfest fyrir Héraðsdómi Reykjaness á miðvikudaginn.