Birgir Guðmundsson, stjórnmálafræðingur við Háskólann á Akureyri, segir stöðu Katrínar Jakobsdóttur, formanns Vinstri grænna sterka, þrátt fyrir mikla gagnrýni frá baklandi flokksins og tveggja þingmanna hans, fyrir að ganga til stjórnarmyndunarviðræðna við Sjálfstæðisflokk og Framsóknarflokk.

 

„Staða Katrínar er sterk þrátt fyrir þessa gagnrýni. Hún nýtur trausts hjá meirihluta þingflokksins og formanna hinna flokkanna. Talað var um ákveðin ramma sem viðræðurnar byggðust á, um málefnasamninginn og skiptingu ráðuneyta og það að Katrín fái væntanlega forsætisráðuneytið gefur það til kynna einnig. Þá hafa þingmenn Sjálfstæðisflokks og Framsóknarflokksins
ekki verið að kippa sér upp við þó sumir þingmenn VG styðji ekki viðræðurnar, sem gefur til kynna að þeir hafi fulla trú á að Katrín sé við
stjórnvölinn,“ segir Birgir.

En hver verður staða Katrínar ef þessar viðræður misheppnast ? Stendur hún veikari eftir ?

„Þeir sem styðja hana núna verða eflaust pirraðir og þeir sem styðja hana ekki munu eflaust gleðjast. En ef hún sér að viðræðurnar eru ekki að ganga upp gæti hún einfaldlega sett fram einhverjar kröfur og borið við að viðræðurnar hafi strandað á málefnunum, en hún myndi ganga snarreist frá viðræðunum, því hún hafi þó reynt. Hitt er svo annað mál, að ef illa fer, þá gæti VG borið álitshnekki af því og jafnvel fengið á sig það orð að vera ekki stjórntækir, eða gjaldgengir í samstarfi almennt. Ég á þó ekki von á að það gerist, það eru það mörg mál sem flokkarnir geta sameinast um. Helsta þrætueplið verður væntanlega um hvaða leiðir verður farið í skattamálum og tekjuöflun, “ segir Birgir.

Ekki er vitað hvenær  fyrsta formlega fundi stjórnarmyndunarviðræðnanna ljúki, hvort það verði nú seinnipartinn eða í kvöld, en talið er að  viðræðurnar allar standi fram að helgi.