Sigrún Sól Ólafsdóttir, leikkona, segist í samtali við Vísi, hafa heyrt samtal Steingríms J. Sigfússonar, fyrrverandi formanns VG, við ónefndan sjálfstæðismann, í flugi frá Akureyri fyrir kosningar, hvar þeir sammæltust um að starfa saman í ríkisstjórn eftir kosningar.

„Steingrímur talaði um mikilvægi þess að hér yrði tveggja flokka stjórn og virtist á honum að þetta væri allt þegar klappað og klárt milli VG og D. Ungi Sjálfstæðismaðurinn var alveg sammála honum. Þetta væru ábyrgustu og sterkustu flokkarnir og nú þyrfti sko traust og stabilet og reynslu. Þetta var allt ákveðið- og svo þegar aðeins undan lét í fylgi VG er lítið mál fyrir þau að kippa Framsókn með – enda líka svo „traust“ og með reynslu. Þau voru búin að ákveða þetta – fyrir löngu.“

Þetta sagði Sigrún Sól við Vísi í dag. Hún segist einnig hafa spurt Steingrím nánar út í þetta samtal eftir flugferðina:

„Hann bara roðnaði og blánaði og gat ekkert sagt- honum var brugðið – ég sagði reyndar að mér hefði orðið óglatt og hvatti hann til að koma hreint fram við kjósendur með þessi áform.“

Þá sendi Sigrún fyrirspurn á Katrínu Jakobsdóttur, formanns Vinstri grænna, varðandi málið:

„Mér finnst algert grundvallaratriði að þið komið hreint fram með hvort þið viljið vinna með Sjálfsstæðisflokknum, á Steingrími heyrðist manni það allt klappað og klárt. Það yrði svo bagalegt ef þið fáið fullt af fylgi – en komið svo eftir á og gerið þetta og reiðin verður svo mikil hjá mörgum sem munu upplifa sig illa svikna og eiga eftir að rífa ykkur i sig og vinna gegn samstarfinu af heift. Heiðarlegra er að koma hreint fram með þetta núna- ef þetta er planið“.

Katrín svaraði ekki fyrirspurninni samkvæmt Vísi.